Ціск на сяброў непрызнаванага ўладамі Саюза палякаў на Беларусі не спыняецца
У Івянцы супрацоўнікі праваахоўных ворганаў ажыццяўляюць ціск на сяброў непрызнаванага ўладамі Саюза палякаў на Беларусі на чале з Анжалікай Борыс.
Міліцыянты наведваюць сяброў арганізацыі і пагражаюць ім звальненнем з працы, вялікімі штрафамі і іншымі рэпрэсіямі ў выпадку, калі людзі не пакінуць шэрагі незалежнай арганізацыі. У тых, хто некалі складаў фінансавыя ахвяраванні дзеля аплаты камунальных паслугаў Дома польскага, бяруць узоры подпісаў і пагражаюць пазбаўленнем заробкаў. На думку адваката Аляксандра Галіева, такія дзеянні праваахоўных ворганаў носяць антызаконны характар, а падставы гэтых дзеянняў выглядаюць абсурдна:
- У ананімцы, паводле якой праводзіцца праверка, пазначана, што Дом польскі пазазаконна атрымліваў ахвяраванні ў 2000 і 2001 гадах, аднак, на самой справе, Дом польскі ў Івянцы пачаў дзейнічаць толькі ў 2003 годзе.
На працягу некалькіх апошніх тыдняў улады ўзмацнілі ціск на Івянецкі аддзел непрызнаванага ўладамі Саюза палякаў: камітэт дзяржаўнага кантролю супольна з міліцыяй і падатковай інспекцыяй паводле ананімкі ажыццяўлюць праверку фінансавай дзейнасці Дома польскага, а старшыня мясцовай суполкі Тэрэза Собаль неаднаразова выклікалася на шматгадзінныя допыты.
