Партыю свабоды і прагрэсу не зарэгістравалі, суд стаў на бок Мінюста

Вярхоўны суд Беларусі не задаволіў скаргу заснавальнікаў Партыі свабоды і прагрэсу на адмову Міністэрства юстыцыі ў рэгістрацыі партыі. Суддзя Мікалай Бабкоў палічыў, што Мінюст меў законныя падставы для адмовы.

У прыватнасці, ён згадаў парушэнне парадку стварэння палітычных партый і непраўдзівасць часткі звестак у пададзеных на рэгістрацыю дакументах.

Старшыня аргкамітэта па стварэнні Партыі свабоды і прагрэсу Ўладзімір Навасяд заявіў, што ён і яго паплечнікі "будуць працягваць і далей займацца палітычнай дзейнасцю". У бліжэйшых планах аргкамітэта падрыхтоўка да ўдзелу ў выбарах у мясцовыя саветы, якія прайдуць у наступным годзе.

БелаПАН нагадвае, што Партыю свабоды і прагрэсу не зарэгістравалі ўжо ў чацвёрты раз.