Яўгену Скрабцу гвалтоўна ўручылі позву ў вайсковы камісарыят
фота mfront.net
Уночы на 25 жніўня ў Берасці быў затрыманы сябра “Маладога Фронту” Яўген Скрабец. Падставаю для затрымання актывіста сталі падазрэнні ў махлярстве, а вынікам - позва ў вайсковы камісарыят на 9 верасня, паведамляе Радыё Рацыя.
Яўген Скрабец вяртаўся з Менску ў Берасце, дзе знаходзіўся па працоўных справах. А 22-ой гадзіне цягнік прыбыў на вакзал у Берасце, дзе Скрабца ўжо чакалі супрацоўнікі міліцыі. Яны паведамілі маладафронтаўцу, што ён вельмі падобны на нейкіх студэнтаў-махляроў, якія гандлююць падробнымі квіткамі каля касаў, і вымусілі паказаць пашпарт. Пасля Яўгена прымусілі праехаць у Ленінскі пастарунак для удакладнення асобы.
Каб Яўген не збег, міліцыянеры узялі сабе пашпарт і увесь шлях ад вакзала да пастарунку трымалі яго за швэдар, паведамляе Радыё Рацыя. У пастарунку актывіста пратрымалі каля паўгадзіны, пасля чаго пад аховай міліцыі даставілі ў камісарыят. Там юнака ўжо чакала позва.
На пачатак 12 гадзіны ночы Яўгена Скрабца адпусцілі.
