Яшчэ адзін суд за акцыю ў гадавіну аварыі на ЧАЭС
Сёння, 21 траўня, а 14-й гадзіне пачнецца суд над віцебскім актывістам грамадзянскай кампаніі «Еўрапейская Беларусь» Кастусём Івановым.
Моладзевы актывіст абвінавачваецца ў непадпарадкаванні загадам супрацоўніка міліцыі, перадае «Радыё Рацыя».
Нагадаем, што пад час правядзення вулічнай акцыі ў Віцебску да гадавіны чарнобыльскай катастрофы Кастуся Іванова затрымалі супрацоўнікі міліцыі і абвінавацілі юнака ў тым, што ён сарваў пагон міліцыянту.
Гэта ўжо ня першы выпадак, калі дэмакратычнага актывіста судзяць за адзначэнне чарнобыльскай трагедыі. Так, на 25 траўня атрымалі позвы ў суд з нагоды чарнобыльскага шэсця лідзкія актывісты «Маладога Фронту» Яўген Руды і Ганна Бунько, ужо адбыўся суд над берасцейскім маладафронтаўцам Яўгенам Скрабцом А 20 траўня пачаўся суд над незалежнай журналісткай Тамарай Шчапёткінай, якая асвятляла акцыю «Свечка памяці» ў Бярозе.
