Судовыя выканаўцы ў чарговы раз апісалі маёмасць Сяргея Панамарова
Сяргей Панамароў
Дом Сяргея Панамарова наведалі судовыя выканаўцы. Яны шукалі маёмасць, якую можна канфіскаваць для пакрыцця штрафаў.
Па словах судовых выканаўцаў, яны меліся канфіскаваць маёмасць у лік штрафу ў 30 базавых велічыняў за спробу арганізаваць сустрэчу з грамадзянамі з удзелам старшыні Таварыства аховы помнікаў Антонам Астаповічам, а таксама дзеля кампенсацыі штрафа ў 9 мільёнаў, які Сяргею Панамарову прысудзілі ў 2006 годзе за, нібыта, неабгрунтаванае ўзбагачэнне.
− Камунальная гаспадарка ўвесь час узбуджае выканаўчую справу. Гаспадарчы суд правярае і паведамляе, што спагнаць маёмасць немагчыма. За апошні год гэтак было тройчы, − кажа былая жонка Сяргея Панамарова Святлана.
Сітуацыя зноў паўтарылася. Судовыя выканаўцы пры сведках праверылі жытло, пашукалі маёмасць і чарговы раз склалі акт аб немагчымасці спагнання.
