Малады Фронт – за школу для ўсіх

Малады Фронт ізноў пікетаваў Міністэрства абароны. Моладзевыя актывісты дамагаюцца для свайго салігорскага паплечніка дазволу здаць апошні школьны экзамен падчас вайсковай службы.

У аўторак удзень пяцёра актывістаў назарэгістраванага Маладога Фронту выйшлі да будынку Міністэрства абароны ў Менску ды разгарнулі расцяжку “Школа для ўсіх”, а таксама перадалі ў прыёмную зварот на імя міністра Леаніда Мальцава з чарговай просьбай прадставіць забранаму ў войска Івану Шыле магчымасць здаць апошні школьны экзамен. Распавядае адна з удзельнікаў акцыі Настасся Лойка:

- Мы чакаем атрымаць ад Міністэрства абароны адэкватнае рашэнне аб дазволе Івану Шыле ўсё ж здаць апошні экзамен, асабліва зважаючы на тое, што пісьмовы дазвол самога Міністэрства адукацыі на гэты ўжо быў атрыманы.

Пасля перадачы звароту маладафронтаўцы згарнулі расцяжку і хутка разышліся, ніхто з удзельнікаў акцыі затрыманы не быў.

Нагадаем, што за сваю палітычную дзейнасць летась Іван Шыла быў адлічаны з салігорскай школы за дзень да апошняга экзамену, а сёлета ў студзені маладзёна пасля доўгіх ваганняў забралі на тэрміновую вайсковую службу ў лепельскую вайсковую частку.