Прафсаюзы не хочуць абараняць працоўных
Прафсаюзны камітэт акцыянернага таварыства “Мастоўдрэў” адмаўляецца абараняць інтарэсы працоўных прадпрыемства. Шматлікія парушэнні заканадаўства, зафіксаваныя інспекцыяй па працы, застаюцца па-за ўвагай кіраўніка прафсаюзнай суполкі.
Дэпутат Мастоўскага савета Зміцер Кухлей атрымаў афіцыйны адказ на свой запыт, накіраваны на імя сташыні прафсаюзнай суполкі акцыянернага таварыства “Мастоўдрэў” Валера Палішэвіча: кіраўнік прафсаюзнай арганізацыі паведаміў, што ў сувязі з адсутнасцю сродкаў запазычанасці працоўным будуць выплочвацца згодна распрацаванага адміністрацыяй графіка.
Аднак,тэрміны выплатаў застаюцца неакрэсленымі - усё залежыць ад фінансава-эканамічнага стану прадпрыемства.
На думку Зміцера Кухлея, такі адказ сведчыць, перш за ўсё, пра нежаданне прафсаюзнага камітэта і яго кіраўніка адстойваць інтарэсы працоўных.
Напрыканцы мінулага года супрацоўнікам “Мастоўдрэва” паводле пазазаконнага загада дырэктара Сяргея Асосава выплата заробкаў ажыццяўлялася не ў поўным памеры, што падцвердзілі праверкі дэпартамента па працы. Аднак, негледзячы на прадпісанне кантралюючага воргана, грошы працоўныя не атрымалі да гэтага часу.
