Міліцыянты патрабуюць тлумачэнняў ад распаўсюджвальнікаў “Народнай волі”
Сёння, 9 снежня, у Берасці моладзевыя актывісты дэмакратычных сіл на вуліцы Пушкінская бясплатна раздавалі нумары газеты "Народная воля" за гэты і мінулы месяцы з заклікам набываць незалежную прэсу цяпер і ў шапіках.
Адразу да іх падышлі супрацоўнікі міліцыі. Яны праверылі дакументы ў Юркі Бакура і Андрэя Шарэнды, а таксама выходныя дадзеныя газеты. Хлопцам было прапанавана прайсці ў аддзяленне для складання тлумачэнняў нібыта па факце тэлефанавання на нумар 102. Паколькі газета "Народная воля" афіцыйна зарэгістравана ў Беларусі і хлопцы не парушалі правапарадку, яны адмовіліся. І працягвалі раздаваць газету. Людзі з задавальненнем прымалі яе і здзіўлена з абурэннем ўспрымалі няўдалыя спробы міліцыі прычапіцца да хлопцаў.
За гадзіну было раздадзена каля 1000 нумароў газеты. Але пасля гэтага хлопцаў усё ж такі папрасілі падысці да аўтамабіля міліцыі, каб скласці тлумачэнні, як сказалі самі супрацоўнікі міліцыі: "Для справаздачы". Пасля чаго хлопцаў адпусцілі.
