«Белсаюздрук» адмовіўся распаўсюджваць «Нашу Ніву»
Рэспубліканскае прадпрыемства «Белсаюздрук» у чарговы раз адмовілася распаўсюджваць праз сваю гандлёвую сетку недзяржаўную газету «Наша Ніва».
Пісьмовую адмову на прапанову аб супрацоўніцтве атрымала 6 кастрычніка рэдакцыя «НН».
«РУП “Белсаюздрук” не плануе ў бліжэйшы час распаўсюджванне газеты “Наша Ніва” праз гандлёвую сетку кіёскаў і крамаў прадпрыемства», — лаканічна паведамляецца ў лісце за подпісам намесніцы дырэктара прадпрыемства Таццяны Івінскай.
Як заўважыў у гутарцы з прэс-службай БАЖ галоўны рэдактар «Нашай Нівы» Андрэй Скурко, гэта не першая такая адмова з пачатку 2006 года на прапановы недзяржаўнага выдання ўзнавіць супрацоўніцтва. Аднак кіраўніцтва рэдакцыі плануе і далей звяртацца з прапановамі аб распаўсюдзе газеты, каб паказаць такім чынам, што не намерана мірыцца з эканамічнай і палітычнай дыскрымінацыяй недзяржаўнай прэсы.
«Сёння, калі беларускія ўлады імкнуцца прадэманстраваць Захаду сваю скіраванасць на дэмакратызацыю, было б нармальным і пазітыўным крокам вярнуць незалежныя выданні, у тым ліку “Нашу Ніву”, у дзяржаўную сістэму распаўсюду. Аднак тыя адмовы, якія мы атрымліваем ад “Белсаюздруку ” і “Белпошты”, паказваюць, што гэтая дэмакратызацыя, на жаль, застаецца па-ранейшаму дэкларатыўнай», — зазначыў Андрэй Скурко.
Нагадаем, распаўсюд газеты «Наша Ніва», як і шэрагу іншых недзяржаўных грамадска-палітычных выданняў, «Белсаюздрук» скасаваў з пачатку 2006 года (напярэдадні прэзідэнцкіх выбараў). Тады ж адмовілася распаўсюджваць па падпісцы недзяржаўныя газеты «Белпошта». З таго часу ўсе спробы незалежных выданняў вярнуцца ў дзяржаўную сістэму распаўсюду не мелі поспеху.
