Пераслед актывістаў кампаніі “Джынс за Свабоду”
Супрацоўнікі КДБ працягваюць пераследваць моладзевых актывістаў. У апошнія дні такія факты зафіксаваныя ў Менску і ў Віцебску.
У Менску супрацоўнікі КДБ двойчы тэлефанавалі бацькам актывісткі кампаніі “Джынс – за Свабоду” Любы Кучынскай і выклікалі дзяўчыну на допыт з нагоды выбуху ў Менску, які адбыўся ў ноч з 3 на 4 ліпеня. Супрацоўнікі КДБ растлумачылі, што іх цікавасць выкліканая тым, што Люба пражывала ў Віцебску ў той час, калі там адбыліся падобныя выбухі.
У Віцебску супрацоўнікі КДБ паспрабавалі завербаваць актывіста кампаніі Кастуся Іванова. Яго выклікалі ў аддзяленне міліцыі з нагоды затрымання за распаўсюджванне ўлётак з заклікам да байкоту выбараў. У міліцыі маладога чалавека сустрэў супрацоўнік КДБ, які прапанаваў яму даваць інфармацыю аб дзейнасці апазіцыі ў Віцебску. Таксама ён цікавіўся адкуль з'яўляюцца ўлёткі і налепкі з заклікамі да байкоту выбараў, паведамляе сайт jeans-by.com
