Анатоля Лябедзьку пусцілі на сустрэчу з выбаршчыкамі толькі пасля “званка”

Учора, 9 верасня, на Барысаўскім заводзе пластмасавых вырабаў адбылася першая сустрэча выбаршчыкаў з кандыдатамі ў дэпутаты Палаты прадстаўнікоў Нацыянальнага сходу РБ, зарэгістраванымі па Барысаўскай гарадской выбарчай акрузе №62.

У сустрэчы прынялі ўдзел тры кандыдаты - дзеючы дэпутат, старшыня абласной арганізацыі "Белая Русь" Віктар Гумінскі, а таксама кіраўнік зарэгістраванай ва Ўкраіне грамадскай кампаніі "За свабоднае развіццё прадпрымальніцтва" Віктар Гарбачоў і рэдактар недзяржаўнай газеты «Борисовские новости» Анатоль Букас.

Мерапрыемства праходзіла ў закрытым рэжыме, на тэрыторыю прадпрыемства не пускалі выбаршчыкаў, не якія працуюць на заводзе. Сакратар акруговай камісіі па Барысаўскай гарадской выбарчай акрузе №62 Таццяна Стасава спрабавала не дапусціць на сустрэчу нават давераную асобу Віктара Гарбачова -- лідэра Аб'яднанай грамадзянскай партыі Анатоля Лябедзьку, заявіўшы, што ў спісе давераных асобаў яго нібыта няма. У рэшце рэшт, пасля званка ў райвыканкам Стасава ўсё жа змушаная была прапусціць Лябедзьку ў канферэнц-залу.

Работнікі прадпрыемства, на сустрэчы іх было каля пяцідзесяці чалавек, не задавалі кандыдатам ніякіх пытанняў. Магчыма, на іх "актыўнасць" паўплывала прысутнасць у канферэнц-зале дырэктара прадпрыемства Леаніда Родзіча.

"Праваабаронцы за свабодныя выбары"