Салаш абвінавачвае Ярмошыну ў распаўсюдзе недакладных звестак
Сёння, 3 верасня, у 15.00 Цэнтральная выбарчая камісія будзе разглядаць скаргі асобаў, вылучаных кандыдатамі ў дэпутаты па Менскай вобласці, і не зарэгістраваных акруговымі камісіямі. У тым ліку будуць разгледжаныя заявы рэдактара газеты «Борисовские новости» Анатоля Букаса (Барысаўская гарадская выбарчая акруга №62) і сябра Партыі БНФ, намесніка дырэктара аддзела грамадскіх сувязяў ГА "Міжнароднае інфармацыйна-аналітычнае агенцтва "Еўрапейская хваля" Сяргея Салаша (Барысаўская сельская выбарчая акруга №63).
Нагадаем, што Анатоля Букаса не зарэгістравалі з-за нібы няпэўных дадзеных у дэкларацыі аб прыбытках, а Сяргея Салаша -- па прычыне вялікай колькасці несапраўдных подпісаў.
Сяргей Салаш у сваё заяве ў Цэнтрвыбаркам, акрамя іншага, абвінаваціў старшыню Лідзію Ярмошыну ў распаўсюдзе недакладных звестак на прэс-канферэнцыі для сродкаў масавай інфармацыі з нагоды яго выкліку ў міліцыю ў сувязі заявай Таццяны Стасавай (сакратара акруговай камісіі па Барысаўскай гарадской выбарчай акрузе №62) і Валянціны Шутко (намесніка старшыні Барысаўскага райвыканкама). Нагадаем, Таццяна Стасава і Валянціна Шутко вінавацяць Сяргея Салаша ў тым, што ён абразіў іх, назваўшы ў прысутнасці чатырох сведак, "фальсіфікатарамі". Ярмошына заявіла журналістам, што Салаша выклікалі ў міліцыю 10 жніўня, у той час як, па словах самога Салаша, у позве, якую ён атрымаў, стаіць дата 18 жніўня - апошні дзень прыёму дакументаў на рэгістрацыю.
"Праваабаронцы за свабодныя выбары"
