ЗАЯВА ЗЬЕЗДУ ПАРТЫІ БНФ Пра кампанію выбараў у Палату Прадстаўнікоў 2008 г.
Зьезд Партыі БНФ выказвае пратэст супраць кампаніі палітычнага перасьледу і незаконых затрыманьняў сябраў Партыі БНФ Юрася Карэтнікава, Антона Койпіша, Ілі Богдана, а таксама іншых дэмакратычных актывістаў, якія былі затрыманыя па падазрэньні ў зьдзяйсьненьні выбухаў падчас сьвяточных мерапрыемстваў у Менску 03.07.2008 г.;
- канстатуе, што нематываваныя ператрусы, затрыманьні ў якасьці падазраваных, допыты і запалохваньні зьяўляюцца нормай паводзінаў ў дачыненьні да дэмакратычных, у першую чаргу нацыянальных, сілаў з боку ўлады;
- зьвяртае ўвагу, што дзяржаўныя СМІ працягваюць весьці няспынную кампанію дыскрэдытацыі дэмакратычных актывістаў;
- адзначае, што ў сытуацыі рэпрэсіяў, наяўнасьці палітычных вязьняў правядзеньне свабодных і празрыстых выбараў робіцца абсалютна немагчымым;
- лічыць, што непразрыстае фармаваньне акруговых камісіяў, нежаданьне ўключыць у іх склад большасьці вылучаных прадстаўнікоў АДС і абсалютнай бальшыні вылучаных Соймам прадстаўнікоў Партыі БНФ, звальненьне з працы Аляксандра Меха (зь беспрэцэдэнтным шантажом яго з боку КДБ) і Леаніда Аўтухова, аўральная мабілізацыя ў войска Віталя Каратыша, цынічная адмова ў рэгістрацыі ініцыятыўнай групы старшыні Менскай абласной арганізацыі Партыі БНФ Зьмітра Вінаградава, сьведчаць пра выразнае нежаданьне ўладаў правесьці мінімальна празрыстыя і дэмакратычныя выбары, якія б набліжалі Беларусь да міжнародных стандартаў.
У сытуацыі, што склалася, Партыя БНФ патрабуе:
1. Аб’ектыўнага расьледаваньня злачынства, зьдзейсьненага 03.07.2008 г.
2. Спыненьня дыскрэдытацыі дэмакратычных актывістаў празь дзяржаўныя СМІ.
3. Правядзеньня роўных, свабодных і справядлівых выбараў, спыненьня ціску з боку сілавых структураў і дзяржаўных органаў на ўдзельнікаў выбарчыга працэсу.
Партыя БНФ заяўляе, што яна можа спыніць свой удзел у несправядлівай і непразрыстай кампаніі “парляманцкіх выбараў” і шырока паінфармуе пра гэта беларускую і сусьветную грамадзкасьць, у выпадку калі:
- будуць засьведчаныя новыя факты дыскрымінацыі або ўціску на кандыдатаў-сяброў Партыі БНФ;
- на акругах, дзе балятуюцца сябры Партыі БНФ, у склад участковых камісіяў не будуць уключаныя прадстаўнікі Партыі БНФ або іншых партыяў, што ўваходзяць у Аб’яднаныя дэмакратычныя сілы.
