Праблемы паўстануць падчас рэгістрацыі кандыдатаў?
Выбарчая кампанія на Гомельшчыне праходзіць пакуль без асаблівага супрацьдзеяння з боку ўлады. Прынамсі, не была зарэгістраваная толькі адна ініцыятыўная група па зборы подпісаў ад аб’яднаных дэмакратычных сіл.
31 ліпеня Цэнтральная выбарчая камісія разгледзіць скаргу Пятра Кузняцова, чыя ініцыятыўная група па зборы подпісаў не была зарэгістравана. Гэта пакуль адзіная страта ў шэрагах гомельскіх дэмакратаў, якія на сёння маюць ініцыятыўныя групы ў 16 з 17 выбарчых акругаў на тэрыторыі вобласці. Але аптымістычныя лічбы яшчэ нельга лічыць паказчыкам таго, што ўлада дае апазіцыі магчымасць паўнавартасна ўдзельнічаць у выбарах. Па словах Васіля Палякова, кіраўніка абласной арганізацыі Аб’яднанай грамадзянскай партыі, з рэгістрацыяй ініцыятыўных груп не было праблемаў і ў часе папярэдніх выбарчых кампаній:
"Праблемы паўставалі толькі падчас рэгістрацыі кандыдатаў. І ўжо тады з зарэгістраваных 5-7 групаў кандыдатамі заставаліся 1-2: адзін ад улады, другі ад апазіцыі".
Унутранае адзінства
Сваім сапраўдным поспехам гомельскія дэмакратычныя сілы лічаць захаванне ўнутранага адзінства. Цягам апошніх двух год кааліцыя здолела прыйсці да паразумення. Як вынік - цяпер у кожнай акрузе Гомельшчыны апазіцыя мае аднаго свайго патэнцыйнага кандыдата ў дэпутаты. Такая стратэгія апраўдвае сябе ў сённяшняй сітуацыі, лічыць Васіль Палякоў:
"Мы ўсё ж такі ўдзельнічаем не ў выбарах, а ў выбарчай кампаніі. Ва ўмовах аўтарытарнага рэжыму можа быць толькі белае ці чорнае: ёсць улада і апазіцыя. Калі некалькі твараў апазіцыі ці некалькі твараў улады, выбаршчыкі губляюцца і не ведаюць, за каго галасаваць. Таму ад улады ёсць адзін прадстаўнік і адзін прадстаўнік павінен быць ад апазіцыі, у дадзеным выпадку ад аб’яднаных дэмакратычных сілаў".
Збор подпісаў ідзе даволі паспяхова
Васіль Палякоў спрабуе трапіць у парламент па Гомельскай-Савецкай выбарчай акрузе №34. Збор подпісаў сярод жыхароў Гомеля ідзе даволі паспяхова, і ініцыятыўная група Палякова ўжо назбірала запаветную тысячу. Аднак у малых гарадах і вёсках Гомельшчыны за апазіцыянераў падпісваецца не больш 30-40% насельніцтва. Актывіст Сяргей Трыфанаў збірае подпісы ў Буда-Кашалёўскім раёне і вылучае некалькі катэгорый людзей, якія не падтрымліваюць апазіцыю:
"Першая катэгорыя – самая маленькая – гэта перакананыя лукашысты. Другая катэгорыя – гэта людзі, якія жывуць па прынцыпу “мая хата з краю”, у іх усё адносна добра ці дрэнна, яны маюць свае праблемы, а нічога іншага ведаць не хочуць. Трэцяя катэгорыя – даволі вялікая – гэта тыя, хто хочуць паставіць, але баяцца наступстваў".
У часе збору подпісаў Сяргей Трыфанаў мае магчымасць непасрэдна размаўляць з электаратам. Па словах маладзёна, падтрымка дзейнага прэзідэнта, як і падтрымка апазіцыі, у рэгіёнах не такая ўжо і вялікая. Людзей прываблівае іншае:
"Я фактычна ўсім кажу – мой кандыдат падтрымлівае еўрапейскі заходні вектар развіцця Беларусі, арыентацыю на нармальныя краіны – Амерыку, Нямеччыну. Многія людзі на гэта ахвотна купляюцца".
