Баранавічы: Утойваецца інфармацыя пра месцы працы сяброў акруговых камісій

Інфармацыю пра месцы працы і пасады сябраў акруговых камісій забаранілі друкаваць па ўсім Баранавіцкім рэгіёне. Пры гэтым такія дадзеныя камісіі не даюць не толькі назіральнікам, а нават сябрам камісій. Так, сябру акруговай камісіі Баранавіцкай сельскай акругі № 7 Яну Савіцкаму да гэтага часу не ўдаецца атрымаць такую інфармацыю.

24 ліпеня на паседжанні акруговай каміссіі № 7 нават было праведзена галасаванне, ці даваць гэтыя дадзеныя, і большасцю галасоў камісія адмовіла іх даваць. Супраць такога рашэння галасаваў толькі адзін сп. Савіцкі. 

Старшыня камісіі  Пётр Дубоўскі — ён жа  намеснік дырэктара баранавіцкай птушкафабрыкі па ідэалагічнай працы лічыць, што выдача гэтых дадзеных – гэта  ўмяшальніцтва ў асабістае жыццё сябраў камісіі!!! 

Аказваецца, такім галасаваннем любая акруговая камісія можа праігнараваць 65 артыкул Канстытуцыі РБ і 13 артыкул Выбарчага кодэкса адпаведна.

“Праваабаронцы за свабодныя выбары”