Прадстаўнікоў апазіцыйных партыяў у камісіях няма, а грамадскасьць на паседжаньне не дапусьцілі
Ні адзін прадстаўнік апазіцыйных палітычных партыяў ня ўключаны ў склад акруговых камісій па выбарах Палаты прадстаўнікоў Нацыянальнага Сходу Рэспублікі Беларусь па Аршанскім рэгіёне (выбарчыя акругі № 26 і 27). Такое рашэньне прынята на сумесным паседжаньні Віцебскага аблвыканкама і Прэзідыума абласнога Савета дэпутатаў. На гэтае паседжаньне не былі дапушчаныя прадстаўнік БХК Васіль Бераснёў і карэспандэнт газеты "Таварыш" Мікола Пятрушэнка, якія выказалі жаданьне прысутнічаць пры абмеркаваньні пытаньня аб фармаваньні выбарчых камісіяў.
У склад акруговай камісіі Сеньненскай акругі № 30 уключаны прадстаўнік ПКБ Мікола Белы.
Поўны склад акруговых камісій Аршанскага рэгіёна да цяперашняга часу не апублікаваны.
"Праваабаронцы за свабодныя выбары"
