У Дзень Волі ў Магілёве была затрыманая журналістка Ганна Ільіна
Дзве гадзіны 25 сакавіка правяла ў міліцэйскім пастарунку рэдактарка недзяржаўнай маланакладнай газеты «Магілёўскі Час» Ганна Ільіна.
Як паведаміла службе маніторынгу БАЖ сама журналістка, яе затрымалі ў цэнтры Магілёва, калі яна раздавала мінакам спецыяльны выпуск свайго выдання, прысвечанага 90-м угодкам БНР. З вуліцы ў пастарунак яе даставілі два міліцыянты, якія адмовіліся назваць сябе.
У Ленінскім райаддзеле міліцыі афіцэр пералічыў колькасць асобнікаў «Магілёўскага Часу», якія былі пры журналістцы. Затым ён склаў пратакол вымання 250-і асобнікаў газеты і паабяцаў даслаць на адрас Ганны квіток на аплату экспертызы, якую спецвыпуск пройдзе ў ідэалагічным аддзеле аблвыканкама. Экспертыза мае высветліць адпаведнасць зместу газеты беларускаму заканадаўству ў сферы СМІ.
