У судзе Савецкага раёну Мінска пачаўся судовы працэс аб прызнаньні Віктара Ганчара без зьвестак адсутным

Суд Савецкага раёну пачаў разгляд справы паводле хадайніцтва Зінаіды Ганчар -- жонкі зьніклага віцэ-сьпікера Вярхоўнага Савету 13-га скліканьня. Зінаіда Ганчар расказала на судзе пра планы Віктара Ганчара перад зьнікненьнем: "19 верасьня 1999 года павінна было прайсьці паседжаньне Вярхоўнага Савета, на якім меўся выступіць Віктар Ганчар, на той час выканаўца абавязкаў старшыні Вярхоўнага Савету. Ён планаваў даць негатыўную ацэнку становішчу ў краіне і паставіць пытаньне пра нелегітымнасьць Нацыянальга сходу. На паседжаньне былі запрошаныя дыпляматы, дзяржаўныя чыноўнікі і, у тым ліку, дэпутаты палаты, якіх таксама не задавальняла тое, што зрабіў з Канстытуцыяй Аляксандар Лукашэнка. Безумоўна, улада вельмі напалохалася, бо гэта было б цалкам законнае рашэньне, і ў Лукашэнкі маглі пачацца вялікія праблемы”. Прадстаўнік Зінаіды Ганчар намесьнік старшыні Беларускага Хельсінкскага Камітэту Гары Паганяйла плануе падчас судовага разьбіральніцтва дамагчыся справаздачы пракуратуры пра тое, як вядзецца расьсьледаваньне.