viasna on patreon

Кватэру светлагорскага актывіста абшукалі на наяўнасьць угнаеньняў

2007 2007-10-06T12:43:42+0300 1970-01-01T03:00:00+0300 be Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

У Светлагорску ўвечары 5 кастрычніка міліцыя правяла вобыск у кватэры Тэльмана Масьлюкова, мясцовага актывіста дэмакратычнага руху. Міліцыянты шукалі ў кніжных шафах каністры з мінеральнымі ўгнаеннямі.

Як паведамілі ПЦ "Вясна" мясцовыя карэспандэнты, яшчэ ў красавіку ў саўгасе “Баравікі” Светлагорскага раёну нібыта адбылася спроба крадзяжу мінеральных угнаенняў, і па гэтай справе праходзіў адзін з членаў сям’і Т. Маслюкова. Па выніках расследвання, якое міліцыя правяла тады, нічога скрадзена не было, і справу спынілі за адсутнасьцю складу злачынства. Аднак цяпер сьледства раптам аднавілі ізноў. Калі верыць пастанове з санкцыяй светлагорскага пракурора, міліцыянты праз 5 месяцаў мусілі шукаць у кватэры “прадметы, якія маюць дачыненне да справы”.

Участковы інспектар, старшы лейтэнат міліцыі Дзяніс Каткавец і следчы, лейтэнант міліцыі Дзмітрый Казак пачалі ператрус з кніжных шафаў. Там міліцыянты знайшлі падшыўку мясцовай незалежнай газеты “Рэгіянальныя навіны”. Пасьля чаго пачалі кансультавацца з кімсьці па тэлефоне, аднак высветлілася, што ў падшыўцы толькі па 1 экземпляру кожнага выпуску. Нічога іншага, што б магло мець “дачыненьне да справы”, выяўлена не было, і падчас вобыску нічога не вынята. У 2005 г., напярэдадні прэзідэнцкіх выбараў, міліцыя праводзіла ў Т. Маслюкова агляд кватэры з мэтаю “пошуку наркотыкаў і зброі”. Цяперашні вобыск Т. Маслюкоў мае намер абскардзіць.

Нагадаем, што 16 верасня праваахоўныя органы ў Светлагорску правялі агляд кватэры Арсенія Ягорчанкі, 17-гадовага студэнта Еўрапейскага гуманітарнага універсітэта ў Вільні. Агляд праводзіўся па крымінальнай справе незарэгістраванай арганізацыі “Малады фронт”. 25 верасня Т. Маслюкоў, які навучаецца ў магістратуры гэтага універсітэта, быў дапытаны ў мясцовым аддзяленьні Камітэта дзяржаўнай бяспекі па той жа справе. 30 верасня міліцыя ў Светлагорску правяла ператрусы кватэраў у Святланы Міхальчанкі і Сяргея Дайнекі, якія выступалі за захаванне сацыяльных ільготаў для інвалідаў, пенсіянераў і моладзі.

Апошнія навіны

Партнёрства

Сяброўства