Пушкінская акруговая камісія ў Менску скасавала рэгістрацыю кандыдата ад Аб’яднанай Грамадзянскай Партыі Івана Анташкевіча.

Пра гэта паведаміла Радыё Свабода. Акруговая камісія пазбавіла Івана Анташкевіча рэгістрацыі на падставе заяваў пяцёх грамадзянаў. Яны цьвердзяць, што давераныя асобы кандыдата раздавалі агітацыйныя ўлёткі разам з нумарам газэты “Народная воля” ад 6 кастрычніка, дзе надрукавана інтэрвію з Іванам Анташкевічам.

Падчас галасаваньня сямёра сябраў камісіі прагаласавалі за скасаваньне рэгістрацыі, а пяцёра — супраць.

Іван Анташкевіч падаў скаргу ў Цэнтарвыбаркам, і яму паабяцалі, што яна будзе разгледжана на паседжаньні ЦВК у суботу а 14-й гадзіне. Іван Анташкевіч называе вінавачаньні на яго адрас хлусьнёй.

Раней за распаўсюд “Народнай волі” на ўчастках былі скасаваныя рэгістрацыі Аляксандра Дабравольскага і Валянціны Палевіковай.