Пагрозы і патрабаваньні выйсьці з ініцыятыўнай групы Сяргея Салаша працягваюць паступаць сябрам ягонай ініцыятыўнай групы

Сябры ініцыятыўнай групы Сяргея Салаша (Партыя БНФ) з Барысаву працягваюць адчуваць на сабе ціск. Па вечарах яны да іх тэлефануюць “невядомыя” і патабуюць выйсьці з ініцыятыўнай групы і болей не зьбіраць подпісы за вылучэньне Сяргея Салаша ў якасьці кандыдата ў дэпутаты.

Такія тэлефанаваньні паступілі сябрам ініцыятыўнай групы Аляксандру Папкову і Аляксандру Будагоўскаму. У іх пыталіся, адкуль яны ведаюць Сяргея Салаша, чаму працуюць у ягонай ініцыятыўнай групе і т.п. А далей гучалі пагрозы: калі вы зараз добра жывеце, то можа ўсё зьмяніцца ў выпадку нявыхаду з ініцыятыўнай групы гэтага прэтэндэнта ў кандыдаты. На пытаньні – хто тэлефануе, просьбы назвацца, заўсёды было ці маўчаньне, ці проста кідалася слухаўка.

Трэба адзначыць, што калі большасьць падобных тэлефанаваньняў зьдзяйсьняецца мужчынамі, то Аляксандру Будагоўскаму званіла жанчына, і пагрозаў з яе вуснаў гучала яшчэ болей.