Затрыманне Ніны Багінскай на Дзень Волі, ціск на беларускія дыяспары: хроніка пераследу 27-29 сакавіка
У Беларусі не спыняюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць "экстрэмісцкімі матэрыяламі і фармаваннямі". Праваабарончы цэнтр "Вясна" 27-29 сакавіка 2024 году збірае факты палітычнага пераследу беларусаў і беларусак – інфармацыя ўвесь час дапаўняецца.
|
Калі вас ці вашых блізкіх затрымалі, паведамляйце нам:
|
За ўдзел у паслявыбарчай акцыі пратэсту быў затрыманы жыхар Жабінкі
- Дзмітрый Салавейка
На "пакаяльным" відэа ад 29 сакавіка ён «"прызнаецца" ва ўдзеле ў акцыі, падпісках на "экстрэмісцкія рэсурсы", а таксама кажа, што трымаў дома нацыянальны сцяг.
Паводле інфармацыі "Медыязоны", затрыманы — Дзмітрый Салавейка.
Завочна збіраюцца судзіць гродзенскага актывіста і былога намесніка старшыні «Маладога фронту»
У адносінах Вадзіма Саранчукова і Аляксандра Кіркевіча распачалі спецвытворчасць па артыкуле аб «садзейнічанні экстрэмісцкай дзейнасці».
Іх запрашаюць вярнуцца ў Беларусь і прыйсці ў гродзенскае ўпраўленне СК.
У "Спіс экстрэмістаў" дадалі яшчэ 18 чалавек — цяпер у ім 3932 прозвішчы
29 сакавіка МУС зрабіла традыцыйны пятнічны апдэйт "Пераліка грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці".
Сярод іншых, у спіс дадалі былога вайскоўца Паўла Кучынскага, асуджанага за данаты Чэслава Канановіча, асуджаную паводле 5-ці арыткулаў Надзею Лапцёнак.
У Беларусі прызналі "экстрэмісцкім" артыкул у нямецкай газеце пра смерць Алеся Пушкіна
25 сакавіка суд Цэнтральнага раёна Мінска прызнаў "экстрэмісцкімі матэрыяламі" два артыкулы нямецкага штотыднёвіка Die Tageszeitung — "Братский народ" как пушечное мясо" (пра тое, ці вырашыць Лукашэнка ўводзіць войскі ва Украіну) і "Наш Пушкин" (пра смерць палітвязня Алеся Пушкіна).
Таксама Спіс экстрэмісцкіх матэрыялаў трапілі:
- Telegram-каналы і чаты "Беларусы Брытанii", "Тутэйшы Шляхцiч", "Filiżanka", "НУЛЕВЫЕ+", "Янгмаша’s Bizarre Adventure", "Belarus Women’s Foundation", "Baranki Punx";
- Instagram старонкі "belarus_in_america", "razam.bremen", "hrystyna_kafka";
- YouTube-канал "Слухай сюда";
- Старонка ў "Аднакласніках" "БХД-Беларуская Хрысцiанская Дэмакратыя";
- TikTok-старонкі "Belarusian volunteers", "дзякую Богу што не маскаль", "Volnyruh", "Вольныя паштоўкі", "bel.info.today24", "Два погляды", "Сергей", "НАУ Беларусь".
У Рагачоўскім раёне быў затрыманы Іван Скуратовіч
- Іван Скуратовіч
Вядома, што затрыманне мужчыны адбылося 27 сакавіка раніцай. Прычына пераследу Івана і яго далейшы лёс высвятляюцца.
У Дзень Волі супрацоўнікі міліцыі прыйшлі да Ніны Багінскай — яе будуць судзіць за нацыянальны сцяг
Як паведамілі 28 сакавіка крыніцы "Белсат", яе адвезлі ў пастарунак і трымалі там да вечара.
Вядомая грамадская актывістка Ніна Багінская мусіць з’явіцца ў суд Першамайскага раёну Мінску для разгляду адміністрацыйнага пратаколу за тое, што ў яе кватэры сілавікі знайшлі нацыянальны сцяг Беларусі. Бел-чырвона-белы сцяг быў на тумбачцы ў пакоі, дзе жыве Багінская.
МУС забараняе беларускія дыяспары — "Асацыяцыя беларусаў у Амэрыцы" прызнаная "экстрэмісцкім фармаваннем"
Рашэнне аб прызнанні "ABA Together (Association of Belarusians in America)" "экстрэмісцкім фармаваннем" было прынятае МУС 28 сакавіка.
Як паведамляецца ў сацсетках ініцыятывы, "агульнанацыянальная арганізацыя ABA аб’ядноўвае беларусаў ЗША. Мы — беларусы-амерыканцы рознага ўзросту, заняткаў і адукацыі, якія жывуць у розных штатах, але звязаны праз сваю беларускую спадчыну, і імкнуцца дапамагаць роднай краіне".
Сілавікі затрымалі жыхара Мінскай вобласці
Пра затрыманне стала вядома 28 сакавіка.
Сцвярджаецца, што мужчына хацеў далучыцца да ўкраінскай арміі і спрабаваў нелегальна перайсці мяжу. Пасля няўдалай спробы ён нібыта напісаў начальніку Галоўнага ўпраўлення разведкі Міністэрства абароны Украіны Кірылу Буданаву з просьбай дапамагчы трапіць ва Украіну, аднак той прапанаваў падарваць адміністрацыйны будынак ці чыгунку ў Беларусі.
Пасля гэтага беларус "патэлефанаваў у польскую амбасаду і сказаў, што гатовы служыць ва ўкраінскім войску" — на наступны дзень яго затрымалі.
ГУБАЗіК паведаміў аб затрыманні мужчыны, які наведваў суды і нібыта перадаваў інфармацыю праваабаронцам
Як паведамілі сілавікі 28 сакавіка, 40-гадовы жыхар Брэста "сістэматычна наведваў суды па крымінальных справах экстрэмісцкай накіраванасці. Ён фіксаваў ход і вынікі пасяджэнняў, інфармацыю аб сведках і прадстаўніках праваахоўных органаў. Далей гэтыя звесткі перадаваліся замежным куратарам для публікацыі на дэструктыўных інтэрнет-рэсурсах".
Следчымі распачата крымінальная справа за садзейнічанне экстрэмісцкай дзейнасці. Мужчына змешчаны ў следчы ізалятар
У Мінску супрацоўнікамі КДБ быў затрыманы гісторык царквы Ілля Вішнеўскі
- Ілля Вішнеўскі
Іллю затрымалі 26 сакавіка.
Вішнеўскі — выпускнік магістратуры Інстытута тэалогіі імя святых Мяфодзія і Кірыла і аспірантуры гістарычнага факультэта Беларускага дзяржаўнага ўніверсітэта.
Цягам больш за 10 гадоў працуе ў Нацыянальным архіве Рэспублікі Беларусь, з'яўляецца вядомым у Беларусі даследчыкам гісторыі канфесійных устаноў, аўтар шматлікіх публікацый аб дзейнасці абнаўленчай царквы ў БССР.
Апошнім часам быў адным з арганізатараў (разам з Мінскай духоўнай акадэміяй і інш.) і мадэратарам працы круглых сталоў па гісторыі рэлігійных супольнасцяў БССР у 1920—1930-я гг. (у т.л. па праблемах узаемадносін праваслаўнай царквы з савецкай дзяржавай і рэпрэсій сярод духавенства) на базе архіўных, адукацыйных і царкоўных устаноў.
На дадзены момант ён знаходзіцца ў ІЧУ на Акрэсціна. Прычыны затрымання і прад'яўленыя абвінавачванні невядомыя, паведаміла "Хрысціянская візія".
У Гомельскай вобласці затрымалі чатырох чалавек за "цынічныя каментары" пра тэракт у Расіі
Затрыманні адбыліся 27 сакавіка. Такімі каментарамі беларускія сілавікі палічылі меркаванні:
• "Ва Украіне кожны дзень кучы нявінных мірных жыхароў гінуць ад абстрэлаў расейцамі гарадоў. Дзе жалобы? Ці ўсе настолькі крывадушнікі?";
• "Чаму нічога не адмяняюць [мерапрыемствы], калі ва Украіне страляюць па жылых дамах і гінуць дарослыя і дзеці? Гэта, напэўна, іншае";
• "Як яны змаглі тэлепартавацца ў ПЯТНІЦУ, калі пробкі з Масквы кіламетровыя на выезд у Бранскую вобл за 5 гадзін?!
Ліха па вушах ездзяць, ды не стыковак шмат у людзей па гэтым сцэнары!".
Адзначым, што як мінімум першыя два каментары набралі дзясяткі "падабаек" ад іншых людзей у сацсетках.
За каментар пра тэракт у Расіі сілавікі затрымалі гродзенскага прадпрымальніка
Пра затрыманне стала вядома 27 сакавіка.
Мужчына пад навіной пра тэракт напісаў "все чаще в РФ прилетает ответка" — сілавікі палічылі гэта "здзекам над ахвярамі тэракту". Таксама затрыманага абвінавацілі ў абразах Лукашэнкі, сілавікоў і заклікаў да украінцаў бамбіць рускія гарады ў адказ.
Беларуса затрымалі за "негатыўны каментар" пра тэракт у Расіі — ён напісаў "Рязанский сахар"
- Раман Якімянок
Пра гэта стала вядома 27 сакавіка з "пакаяльнага" відэа.
Таксама яго абвінавацілі ў тым, што ён нібыта дасылаў інфармацыю праекту Nexta.
Паводле інфармацыі "Нашай Нівы", затрыманы — Раман Якімянок.
