За 10 данатаў палку Каліноўскага мужчыну асудзілі да 5 гадоў калоніі
У Мінскім абласным судзе 18 снежня асудзілі за дзесяць данатаў палку імя Кастуся Каліноўскага 31-гадовага Чэслава Канановіча. Яго абвінавацілі паводле ч. 2 арт. 361-3 Крымінальнага кодэкса "фінансаванні дзейнасці для ўдзелу на тэрыторыі замежнай дзяржавы ва ўзброеным фармаванні, альбо ва ўзброеных канфліктах" і прызначылі пяць гадоў калоніі ва ўмовах узмоцненага рэжыму. Такі прысуд вынес Вячаслаў Тулейка.
- Чэслаў Канановіч. Фота з сацыяльных сетак
Згодна версіі абвінавачвання, якую апублікавала прэс-служба генеральнай пракуратуры, Чэслаў Канановіч нібыта здзейсніў "на карысць экстрэмісцкага фармавання 10 банкаўскіх пераводаў на агульную суму звыш 1200 рублёў". Пазіцыя мужчыны і іншыя падрабязнасці справы невядомыя. Суд пачаўся 14 снежня.
У выніку Вячаслаў Тулейка прызначыў Канановічу пяць гадоў калоніі ва ўмовах узмоцненага рэжыму. Менавіта такое пакаранне запрашваў дзяржабвінаваўца ад генеральнай пракуратуры ў судзе.
Падтрымайце Чэслава бандэролькай, грашовым пераводам альбо лістом: СІЗА-1, 220030, г. Мінск, вул. Валадарскага, 2, Чэслаў Вайцехавіч Канановіч
