10 сакавіка падчас акцыі «СТОП Лукамол!» ў Барысаве супрацоўнікі міліцыі затрымалі лідэра барысаўскіх «Зуброў» Аляксандра Моніча, удзельніка Еўрапейскай кааліцыі «Свабодная Беларусь» Зьміцера Бародку і грамадскага актывіста Ігара Ледніка.

10 сакавіка каля 50 чалавек прынялі ўдзел у акцыі, якая адбылася ў Барысаве на цэнтральнай плошчы. Аляксандр Моніч зачытаў зварот да ўладаў з патрабаваньнем спыніць прымусовы прыём моладзі ў праўрадавы Беларускі Рэспублікаснкі Саюз Моладзі. На снезе перад вокнамі барысаўскага камітэта БРСМ актывісты «Зубра» напісали метровымі літарамі «СТОП лукамол!», пасьля адбылося сімвалічнае спальваньне лістовак з эмблемай БРСМ.

Пасьля заканчэньня акцыі супрацоўнікі міліцыі затрымалі лідэра барысаўскіх «Зуброў» Аляксандра Моніча, удзельніка Еўрапейскай кааліцыі «Свабодная Беларусь» Зьміцера Бародку і грамадскага актывіста Ігара Ледніка. У ГУУС з затрыманых былі ўзятыя тлумачальныя і складзеныя пратаколы па арт.167-1 КаАП (парушэньне ўсталяванага парадку і правядзеньня масавых мерапрыемстваў).