Новыя затрыманні і звальненні: хроніка палітычнага пераследу 9 -10 студзеня Дапоўнена
Рэпрэсіі супраць беларусаў за іх актыўную грамадзянскую пазіцыю і незадаволенасць дзеяннямі ўлады працягваюцца і ў новым 2022 годзе. 9 і 10 студзеня па-ранейшаму затрымліваюць грамадзян, праводзяццца ператрусы, людзей звальняюць па палітычных перакананнях і ўжываюць розныя іншыя формы ціску на беларусаў. Тэлеграм-чаты і каналы прызнаюць экстрэмісцкімі матэрыяламі і фарміраваннямі. Праваабаронцы «Вясны» працягваюць збіраць апошнія факты палітычнага пераследу ў Беларусі.
|
Калі вас ці вашых блізкіх затрымалі, паведамляйце нам:
|
9 студзеня
У Гародні затрымлівалі стаматолага Тураева
- Аляксандр Тураеў
Як мінімум 8 сілавікоў прыйшлі да Аляксандра Тураева ў дом 9 студзеня. Мужчыну паклалі тварам у падлогу. На пытанне, якое дачыненне ён мае да пратэснай дзейнасці, мужчына адказаў: «Абсалютна ніякае».
На відэа ператрусу дома ў мужчыны паказалі пісталет, патроны і часопісы з аголенымі жанчынамі. Гарадзенец патлумачыў, што патроны ён прывёз з Манголіі, яны ў яго захоўваюцца з 1990-га. Які закон ён парушыў часопісамі і для чаго на іх звярнулі ўвагу, сілавікі не абгрунтавалі.
У «пакаяльным» відэа мужчына сказаў, што яго затрымалі за абразу службовых асоб і прэзідэнта ў сацсетках, паведамляе "Новы Час".
Гарадзенец затрыманы за датычнасць да чат-бота "Перамога"
Да Максіма Публіцкага па месцы жыхарства прыйшлі не менш трох сілавікоў у экіпіроўцы. Па прызнанні на відэа, ён абражаў у Інтэрнэце службовых асоб, а летам 2021 года запусціў чат-бот "Перамога". Ён прызнаў віну, піша hrodna.life. Сілавікі сцвярджаюць, што прыйшлі да яго па "злітай базе плана "Перамога".
Звольнілі дырэктарку музея Янкі Купалы Алену Ляшковіч
Дырэктарка літаратурнага музея Янкі Купалы Алена Ляшковіч звольненая са сваёй пасады яшчэ 5 студзеня, але інфармацыя стала вядомая пазней.
Алена Ляшковіч нарадзілася ў Вілейскім раёне. Скончыла гістарычны факультэт БДУ, працавала ў Рэспубліканскім навукова-метадычным цэнтры народнай творчасці і культпрасветработы, затым у Інстытуце праблем культуры.
Як паведамляе “Наша Ніва”, Ляшковіч узначаліла музей у 2007 годзе. Пад яе кіраўніцтвам быў рэалізаваны шэраг цікавых праектаў, абноўленая экспазіцыя музея. У прыватнасці, да 130-годдзя з дня нараджэння Купалы з'явілася экспазіцыя «Шляхі».
Пры ёй у экспазіцыі музея з'явіліся мультымедыйныя магчымасці: тэматычныя кліпы ў 3D-фармаце, віртуальныя экскурсіі па філіялах музея.
Раней імя Ляшковіч фігуравала ў пасквілі прапагандыста Андрэя Мукавозчыка.
Як паведамляе Reform.by спасылаючыся на свае крыніцы з музэйных колаў, прычынай звальнення Ляшковіч стала яе прынцыповая пазыцыя — экс-дырэктарка адмовілася звальняць сваіх супрацоўнікаў з надуманых «палітычных» прычынаў.
10 студзеня
У калоніі ціснуць на палітзняволеную Алену Маўшук. Блізкія хвалююцца за яе жыццё.
Як стала вядома праваабаронцам, да палітзняволенай пінчанкі Алены Маўшук у калоніі ўжываецца ціск. Жанчыну пазбавілі ўсіх перадач і спатканняў з блізкімі. У нядаўняй тэлефоннай размове з маці яна сказала, што ўсіх любіць, але не вытрымлівае. Палітзняволеная знаходзіцца ў падушаным псіхалагічным стане. Вядома, што ёй перыядычна выпісваюць пакаранні.
«Алена па-ціху трымаецца. Ёй там вельмі цяжка і сумна, у яе там усё вельмі дрэнна. Я думаю, вы павінны разумець, што гэта значыць», — піша на волю з іншай калоніі яе палітзняволены муж Сяргей. Ён раіць дасылаць жонцы лісты першым класам — «тады можа перададуць».
Палітзняволенага Максіма Знака з СІЗА на вуліцы Валадарскага ў Менску этапавалі папраўчую калонію №3 «Віцьба», паведамляюць праваабаронцы.
Сам Максім Знак у лістах зазначае, што пакуль знаходзіцца на карантыне.
Максім Знак — адвакат, сябра Каардынацыйнай рады, паэт, музыка, спартовец, трыятляніст. У закрытым рэжыме яго асудзілі на 10 гадоў калёніі за тое, што нібыта «заклікаў нашкодзіць нацыянальнай бясьпецы Беларусі», «хацеў захапіць уладу ў краіне», а таксама быццам «стварыў экстрэмісцкае фарміраванне».
Новы адрас для лістоў Максіму Знаку:
211322, Віцебская вобласць, Віцебскі раён, п. Віцьба, ВК-3
Затрыманы стваральнік ютуб-канала «Трэці Рэгіён Беларусь» Алег Канавалаў
Вядома, што Алег у 2020 годзе пераехаў ва Ўкраіну. На навагоднія святы ён прыехаў у Беларусь, дзе і быў затрыманы.
Папярэдне, супраць мужчыны распачалі крымінальную справу за распальванне сацыяльнай варожасці.
Трох анархістаў абвінавачваюць ва ўдзеле ў экстрэмісцкім фарміраванні "Прамень"
Як стала вядома праваабаронцам "Вясны", анархістам Яўгену Рубашку, Аляксандру Бялову, і Арцёму Салаўю прад'яўленыя новыя абвінавачванні па ч. 3 арт. 361-1 Крымінальнага кодэкса — удзел у экстрэмісцкім фарміраванні. Пра гэта ў лістах актывісты паведамілі блізкім і родным. Цяпер ім пагражае да шасці гадоў зняволення.
Таксама вядома, што ў дадзены момант хлопцы знаёмяцца з матэрыяламі справы, у хуткім часе яна будзе перададзена ў пракуратуру для накіравання ў суд.
Нагадаем, Аляксандр Бялоў і Яўген Рубашка былі затрыманыя 29 ліпеня, а Арцём Салавей — 4 жніўня. Усіх іх супрацоўнікі ГУБАЗіК збівалі пры затрыманні. Пазней анархістам прад'явілі абвінавачванні па ч. 1 арт. 342 КК і змясцілі пад варту ў СІЗА.
Расія экстрадзіравала на радзіму беларуса Дзмітрыя Падлобнікава
Праваабаронцам стала вядома, што Расія выдала беларускім уладам жлобінца Дзмітрыя Падлобнікава. Папярэдне, ён знаходзіцца ў гомельскім СІЗА-3.
25-гадовага хлопца абвінавачваюць у супраціве сілавікам і спробе нанесці ўдары супрацоўніку міліцыі падчас акцыі пратэсту ў дзень прэзідэнцкіх выбараў у Жлобіне. Яму пагражае да 7 гадоў пазбаўлення волі.
Палітвязню з псіхічным захворваннем Дзмітрыю Гопце адмовілі ў памілаванні
Пра гэта паведаміла ягоная маці, піша @viasna96. 22-гадовы гамельчук мае псіхічнае захворванне, звязанае са значным парушэннем паводзін, якое патрабуе догляду і лячэння, з-за гэтага мае разумовую адсталасць. Аднак гэта не перашкодзіла суду асудзіць яго на 2 гады калоніі за падзеі 9 і 10 жніўня ў Жлобіне.
Супраць актывісткі Алены Лазарчык распачалі крымінальную справу — пасля выбараў яе сына забіралі ў прытулак
Праваабаронцам стала вядома, што 30 снежня затрымалі актывістку «Еўрапейскай Беларусі» Алену Лазарчык. 7 студзеня яе перавялі ў СІЗА і прад'явілі абвінавачванні па арт. 342 КК.
Пасля выбараў 2020 года шырокі рэзананс атрымала гісторыя, калі сына Алены на некалькі дзён забралі ў прытулак. Лазарчык затрымалі днём 17 верасня, у гэты час яе сын Арцём знаходзіўся ў школе. Калі жанчыну ўвечары адпусцілі, то яна даведалася, што педагогі выклікалі органы апекі, якія павезлі хлопчыка ў прытулак Фрунзенскага раёна.
Праз два дні да прытулку прыйшлі сотні чалавек, якія вырашылі падтрымаць жанчыну. У выніку, Алене вярнулі сына.
Інфармацыя дапаўняецца.
