Тры гады эксперты «слухалі» вінілавыя пласцінкі ў пошуках «экстрэмізму»
Роўна праз тры гады актывісту Яўгену Жураўскаму вярнулі практычна ўсе аўдыё-касеты, CD-дыскі і вінілавыя пласцінкі, канфіскаваныя пры налёце на канцэрт у клубе «Піраты» 10 студзеня 2015 года.
У заключэнні Рэспубліканскай экспертнай камісіі па ацэнцы інфармацыйнай прадукцыі Міністэрства інфармацыі Беларусі пад №100 ад 21 верасня 2017 года гаворыцца, што сярод прадстаўленых на экспертызу матэрыялаў выявіліся тыя, якія ўтрымліваюць прыкметы праяваў экстрэмізму. Такімі матэрыяламі былі прызнаныя вінілавыя пласцінкі "The Prowlers", "Produ z enten der froide", "Zla Krew", "Knights of the oppressed", а таксама укладыш да пласцінкі "Guts out", і чатыры CD-дыска: "Solidari Tat", "Social Workers", "Cios", "Rash revolt in Russia".
За выключэннем іх, уся астатняя маёмасць (больш за 40 найменняў) была вернута актывісту.
Цікава, што ў камісію ўваходзіла рэдактар першай катэгорыі ДУ "Нацыянальная кніжная палата Беларусі" Алена Шаран з вышэйшай адукацыяй па спецыяльнасці «нямецкая мова, ангельская мова», аднак «інфармацыйная прадукцыя на замежных мовах не даследавалася, так як валоданне замежнымі мовамі не ўваходзіць у кампетэнцыю экспертаў».
Расшыфроўка жа значэнняў розных абрэвіятур, эмблемаў і лагатыпаў, а таксама пошук інфармацыі аб музычных калектывах і тэкстах музычных кампазіцый ажыцяўлялісь экспертамі на інтэрнэт-сайтах з дапамогай пошукавай сістэмы Google.
У выніку, тыя вінілавыя пласцінкі на замежных мовах, якія былі прызнаныя змяшчаючымі прыкметы экстрэмізму, ацэньваліся ў большай ступені візуальна, чым змястоўна, і апынуліся такімі толькі з-за выявы на вокладцы абрэвіятуры АСАВ.
Эксперты трактавалі гэтую абрэвіятуру наступным чынам:
«Абрэвіятура «АСАВ» ўяўляе сабой пачатковыя літары словаў выразу «All Cops Are Bastards» (рус.«усе копы - ублюдкі») ці «All Coppers Are Bastards» (рус.«усе мянты - ублюдкі») і выкарыстоўваецца пераважна для намінацыі органаў правапарадку, мае выключна негатыўную канатацыю. Па дадзеных Сучаснага тлумачальнага слоўніка рускай мовы пад рэдакцыяй Т.Ф. Яфрэмавай лексема ўблюдак мае значэнне «нягодны, нікчэмны чалавек». Такім чынам, значэнне аналізаванага сказу «усе мянты - ўблюдкі» вербальна можна ўявіць, як: «усе органы правапарадку - недастойныя і нікчэмныя людзі».
Разглядаемы сказ мае непрыстойную форму выказвання, паколькі ўключае лексіку, якая адносіцца да разраду лаянкі, і, такім чынам, абрэвіятура «АСАВ» з'яўляецца абразлівай ў адносінах да прадстаўнікоў органаў правапарадку.
Такім чынам, аналізуемы аб'ект даследавання змяшчае лінгвістычныя прыкметы прыніжэння прадстаўнікоў органаў правапарадку».
Тэксты некаторых песень на рускай мове таксама былі прызнаныя «экстрэмісцкімі», а менавіта такімі, якія маюць прыкметы выказванняў, накіраваных на заахвочванне да гвалтоўных дзеянняў у адносінах да прадстаўнікоў дзяржаўнай улады і праваахоўных органаў, а таксама да супрацьпраўных дзеянняў, непадпарадкаванню законах і інш.
Сам Яўген Жураўскі лічыць заключэнне Рэспубліканскай экспертнай камісіі смешным:
«За тры гады ніхто так і не правёў нармальную экспертызу. Справаздача больш, чым на 30 старонках, у асноўным змяшчае апісанне вокладак і часам тэксты песень асобных музычных гуртоў.
Амаль усе матэрыялы, якія маюць прыкметы экстрэмізму, прызнаныя экспертамі такімі толькі па вокладцы. Тэксты песень такіх пласцінак і CD-дыскаў ніхто не слухаў і не аналізаваў. «Экспертам» хапіла толькі абрэвіятур, выкарыстаных у афармленні вокладак, а які сэнс нясуць тэксты альбомаў іх не цікавіла.
Я катэгарычна не згодны з рашэннем гэтых «экспертаў» і буду яго абскарджваць».
Што да справы аб адміністрацыйным правапарушэнні ў адносінах да актывіста, то супрацоўнік Ленінскага РУУС г. Мінска Н. Ермалінскі накіраваў яго ў раённы суд толькі ў канцы кастрычніка 2017 года. Аднак, суддзя Юлія Кавяка ў адказ на гэта ўказала міліцыянтам, што пратакол, складзены 10 студзеня 2015 года ў дачыненні да Яўгена Жураўскі, пакінуты без разгляду ў сувязі са сканчэннем тэрмінаў накладання адміністрацыйнага спагнання.
«З мэтай рэалізацыі прынцыпу непазбежнасці адказнасці прашу давесці да падначаленых супрацоўнікаў патрабаванні арт. 7.6 КаАП "Тэрміны накладаньня адміністрацыйнага спагнаньня" і прыняць вычарпальныя меры да недапушчэнні падобных парушэнне заканадаўства надалей», - падкрэсліла яна ў сваім лісце.
Намеснік начальніка Ленінскага РУУС Сяргей Дубовік у адказ на гэта растлумачыў суду, што "прычынай і ўмовай накіравання справы аб адміністрацыйным правапарушэнні з заканчэннем тэрмінаў прыцягнення да адміністрацыйнай адказнасці з'яўляецца доўгае правядзенне экспертызы (больш за 2 гады) у Рэспубліканскай экспертнай камісіі па ацэнцы інфармацыйнай прадукцыі на прадмет наяўнасці (адсутнасці) ў ёй прыкмет праяваў экстрэмізму".
Ён таксама ўказаў, што інфармацыя аб недапушчэнні накіравання спраў аб адміністрацыйным правапарушэнні з заканчэннем тэрмінаў прыцягнення да адміністрацыйнай адказнасці даведзена да ведама асабістага складу МГБ УУС адміністрацыі Ленінскага раёна г. Мінска, з мэтай выключэння ў далейшай працы парушэнняў нормаў працэсуальнага заканадаўства пры вядзенні адміністрацыйнага працэсу.
Нагадаем, вечарам 10 студзеня 2015 года ў мінскі клуб "Піраты", дзе праходзіў панк-канцэрт, уварваліся супрацоўнікі міліцыі і АМАПу ў масках, якія паставілі ўсіх тварам да сцяны, а некаторых паклалі на падлогу. Не знайшоўшы наркотыкаў, супрацоўнікі міліцыі затрымалі некалькі чалавек, у тым ліку і Жураўскага, які меў пры сабе дыскі і вінілавыя пласцінкі. Атрыбутыку і дыскі забралі на экспертызу на наяўнасць экстрэмізму, а актывісту вынеслі афіцыйнае папярэджанне без ацэнкі экспертаў, проста так, "пра запас".
16 студзеня была прызначаная экспертыза на наяўнасць у канфіскаваных кампакт-дысках, аўдыёкасетах і вінілавых пласцінках прыкметаў экстрэмізму і анархізму (!). Гэтыя рэчы былі перададзеныя Рэспубліканскай экспертнай камісіі па ацэнцы інфармацыйнай прадукцыі Міністэрства інфармацыі Беларусі.
Праз дзевяць месяцаў Яўгену Жураўскаму стала вядома, што Рэспубліканская экспертная камісія працягнула тэрмін экспертызы на нявызначаны тэрмін.
