Дэпутаты Сейму звяртаюцца да беларускіх уладаў з заклікам спыніць рэпрэсіі і распачаць шырокі дыялог з грамадзянскай супольнасцю Відэа

2017 2017-03-23T16:14:13+0300 2017-03-24T02:54:42+0300 be http://spring96.org/files/images/sources/sejm-sustrecha.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Прадстаўнікі палітычных партый і грамадзянскай супольнасці Беларусі у польскім сейме 23 сакавіка.

Прадстаўнікі палітычных партый і грамадзянскай супольнасці Беларусі у польскім сейме 23 сакавіка.

23 сакавіка ў Сейме Рэспублікі Польша адбыліся парламенцкія слуханні з удзелам прадстаўнікоў палітычных партый і грамадзянскай супольнасці Беларусі. На слуханні былі запрошаныя і бралі ўдзел, у прыватнасці, старшыня Беларускай асацыяцыі журналістаў Андрэй Бастунец і старшыня Праваабарончага цэнтра “Вясна” Алесь Бяляцкі.

У Варшаву планавалася таксама запрасіць старшыню Аб’яднанай грамадзянскай партыі Анатоля Лябедзьку, старшыню Руху "За Свабоду" Юрася Губарэвіча і сустаршыню БХД Віталя Рымашэўскага, аднак палітыкі у гэтыя дні адбываюць арышт за ўдзел у акцыі пратэсту ў Маладэчне.

Алесь Бяляцкі ў тэлефоннай размове паведаміў, што пад час слуханняў галоўная ўвага была прыцягнутая да сітуацыі ў Беларусі, якая вельмі імкліва разгортваецца ў апошні час. Польскіх дэпутатаў моцна ўразіла тое, што праваабаронцы аператыўна давалі інфармацыю пра затрыманні і пераслед удзельнікаў мірных акцый пратэсту.

Па выніках слуханняў у Сейме была прынятая рэзалюцыя па справе крызісу ў Беларусі.

“Камісія замежных спраў польскага сейму выказвае глыбокую занепакоенасць нарастаючай хваляй рэпрэсій супраць удзельнікаў грамадскіх пратэстаў – незалежных журналістаў і грамадскіх дзеячоў Беларусі”, – гаворыцца ў дакуменце.

Камісія патрабуе ад беларускіх уладаў неадкладнага спынення пераследу і вызвалення ўсіх арыштаваных і асуджаных, а таксама выказвае салідарнасць з ахвярамі рэпрэсій, іх сваякамі і блізкімі.

 Алесь Бяляцкі таксама паведаміў, што Камісія замежных спраў выказала ўпэўненасць, што адзіным спосабам вырашэння грамадскага і гаспадарчага крызісу ў Беларусі з’яўляецца распачынанне дыялогу уладаў з грамадзянскай супольнасцю і дэмакратычнай апазіцыяй.

Па словах праваабаронцы, гэты зварот быў прыняты адзінагалосна, што сведчыць пра глыбокую заклапочанасць польскіх дэпутатаў і палітыкаў пагаршэннем сітуацыі ў Беларусі. Менавіта таму ў такой форме дэпутаты звяртаюцца да беларускіх уладаў з заклікам спыніць рэпрэсіі і распачаць шырокі дыялог з грамадзянскай супольнасцю.

“Удзел прадстаўнікоў грамадзянскай супольнасці Беларусі ў працы польскага сейму мае і сімвалічнае значэнне, як праява салідарнасці з ахвярамі рэпрэсій, з усім беларускім народам пад час няпростых гадзінаў нашай гісторыі” – паведаміў Алесь Бяляцкі.

Апошнія навіны

Партнёрства

Сяброўства