viasna on patreon

На Віцебшчыне зарэгістравана 48 ініцыятыўных груп. Але пікеты ладзяць толькі дэмакратычныя актывісты

2016 2016-07-11T21:12:26+0300 2016-07-11T21:12:47+0300 be https://spring96.org/files/images/sources/vicebsk-zbor-damaskina-1.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Полацк. Збор подпісаў за вылучэнне Вольгі Дамаскінай

Полацк. Збор подпісаў за вылучэнне Вольгі Дамаскінай

Паспяхова прайшлі рэгістрацыю ўсе 48 ініцыятыўных груп, якія падалі заявы ў выбаркамы і маюць намер збіраць подпісы грамадзян у падтрымку вылучэння сваіх прэтэндэнтаў у кандыдаты.

З 48 прэтэндэнтаў на ўдзел у выбарах 7 ініцыятыўных груп стварылі прадстаўнікі Партыі БНФ, 5 - Беларускай партыі левых "Справядлівы свет", 4 - Аб'яднанай грамадзянскай партый, 3 - Ліберальна-дэмакратычнай партыі, па адным прэтэндэнце ў кандыдаты прадстаўляюць Беларускую сацыял-дэмакратычную партыю (Грамада) і партыю "Беларуская сацыял-дэмакратычная Грамада ".

Найбольшая колькасць  ініцыятыўных груп (па 7) зарэгістраваны ў Віцебскай-Чкалаўскай №18 і Віцебскай-Чыгуначнай №19 выбарчых акругах. Першымі “ў народ” пайшлі прыхільнікі Таццяны Севярынец: яшчэ тыдзень таму каля гандлёвага цэнтру “Green” быў арганізаваны першы пікет па зборы подпісаў у Віцебску. У мінулыя выходныя спадарыня Таццяна зноў брала ўдзел у вулічным зборы подпісаў – каля кармы “Еўраопт” у мікрараёне Білева.

“Як высвятляецца, не ўсе ў нас ведаюць, што ў краіне распачалася выбарчая кампанія, і што зараз ідзе збор подпісаў за вылучэнне кандыдатаў.  Мы паспрабавалі выкарыстаць вазок для прадуктаў, каб замацаваць сцяг БХД. На наша здзіўленне, ахоўнікаў і прадстаўніка адміністрацыі абурыла не наша памкненне “прысабечыць” маёмасць крамы, а менавіта сцяг! Яго і называлі “забароненым”, і патрабавалі зняць, і ўвогуле ў нас склалася такое ўражанне, што гэтыя людзі не чулі ні пра выбары, ні пра пікеты, якія дазваляе арганізоўваць выбарчае заканадаўства”, - кажа Таццяна Севярынец.

Сапраўды, каб пікеты па зборы подпісаў стаялі на Віцебшчыне на кожным кроку, то і непаразуменняў падобнага кшталту было б меней. Але ж, апрача спадарыні Севярынец, пікеты ў мінулыя выходныя арганізавалі хіба пара чалавек. У Віцебску гэта прыхільніца стварэння партыі БХД Алена Шабуня, якая збірала подпісы за сваё вылучэнне на тэрыторыі Віцебскай-Чыгуначнай выбарчай акругі №19.  А ў Полацку прайшоў збор подпісаў за Вольгу Дамаскіну, удзельніцу Руху “За Свабоду”, якая мае намер балатавацца па Полацкай гарадской акрузе №27.

Полацк. Збор подпісаў за вылучэнне Вольгі Дамаскінай

“У мінулыя выходныя мая ініцыятыўная група зладзіла пікет у Полацку, каля Дома гандлю. Неўзабаве дзяўчаты патэлефанавалі і паведамілі, што іх адтуль праганяюць. Давялося ўмяшацца: патэлефанаваць у акруговую камісію і нагадаць, што гэтае месца не ўваходзіць у пералік забароненых для збору подпісаў. Дарэчы, меў месца і яшчэ адзін выпадак. У  суботу 9 ліпеня я хвілін 20 правяла на пікеце падчас абедзеннага перапынку. Калі вярнулася, то дырэктар сказала мне напісаць тлумачальную, колькі часу я адсутнічала. Давялося тлумачыць, што ў адпаведнасці з калектыўнай  дамовай я маю 20-хвілінны абедзенны перапынак і яшчэ два перапынкі па 15 хвілін на працягу дня, так што  працоўнай дысцыпліны я не парушыла», -- распавяла Вольга Дамаскіна.

Спадарыня Вольга працуе загадчыцай Музея традыцыйнага ручнога ткацтва Паазер´я ў Полацку. Але ўжо мае папярэджанне, што яе звольняць па сканчэнні працоўнага кантракта. Папярэджанне спадарыня атрымала якраз неўзабаве пасля таго, як абвясціла пра свой намер балатавацца на выбарах у Палату прадстаўнікоў.

Пікеты па зборы подпісаў пакуль не сталі масавай з’явай на Віцебшчыне. Праваабаронцы не выключаюць, што, як і раней, для збору подпісаў за вылучэнне “патрэбных” кандыдатаў будзе задзейнічаны адміністрацыйны рэсурс. А вулічныя пікеты найперш імкнуцца праводзіць кандыдаты ад дэмакратычных сілаў – бо гэта не толькі сродак збору подпісаў, але і магчымасць заявіць пра існаванне пэўнай арганізацыйнай структуры ва ўмовах, калі афіцыйныя СМІ і тэлебачанне прынцыпова адмаўляюцца асвятляць падзеі “з жыцця апазіцыі”.

“Праваабаронцы за свабодныя выбары”

Апошнія навіны

Партнёрства

Сяброўства