Пратакол за Міжнародны дзень правоў чалавека?
Актывіст “Еўрапейскай Беларусі” Леанід Кулакоў
Актывіста “Еўрапейскай Беларусі” Леаніда Кулакова па тэлефоне выклікаў участковы РУУС Першамайскага раёна. Ён папярэдзіў Леаніда, што сёння ў апорным пункце будзе складаць пратакол аб адміністратыўным правапарушэнні за несанкцыянаваную акцыю. І дадаў, што суд павінен адбыцца ў панядзелак.
Верагодна міліцыі стала вядома, што 10 снежня, у Міжнародны дзень правоў чалавека, актывісты “Еўрапейскай Беларусі” правялі ў цэнтры Мінска пікет, накіраваны на адмену смяротнага пакарання. “10 снежня - Дзень правоў чалавека! Жыццё дадзена Богам, а не катам. Не смяротнаму пакаранню!” – з такім плакатам выйшлі на акцыю актывісты, сярод якіх быў і Леанід Кулакоў.
Пазней Леанід Кулакоў паведаміў, што участковы інспектар узяў у яго пісьмовыя тлумачэнні наконт акцыі 10 снежня. Па ягоных словах суд хутчэй за ўсё адбудзецца праз некалькі дзён.
