Гомель: Студэнтам універсітэта прапануюць выходны, каб яны прагаласавалі датэрмінова
10 снежня ў Гомельскім дзяржаўным універсітэце ім.Ф.Скарыны адбылася сустрэча рэктара Аляксандра Рагачова са студэнтамі і выкладчыкамі ВНУ. Перад аўдыторыяй выступіў кіраўнік універсітэта і студэнт матэматычнага факультэта. Рэктар і студэнт былі дэлегатамі Усебеларускага сходу, уражаннямі ад якога і падзяліліся з аўдыторыяй.
«Фактычна рэктар і студэнт агітавалі за тую праграму сацыяльна-эканамічнага развіцця Беларусі, якую прапанавала ўлада. Аляксандр Рагачоў у сваім выступленні крытыкаваў альтэрнатыўных кандыдатаў, казаў, што яны даюць пустыя абяцанні, якія ніколі не выканаюць», распавёў адзін з прысутных на сустрэчы студэнтаў.
Па яго словах, рэктар агітаваў студэнтаў за датэрміновае галасаванне і прапанаваў адмяніць заняткі 18 снежня – каб студэнты прагаласавалі датэрмінова. «Цікава, што ў зале былі галасы супраць датэрміновага галасавання, нават улічваючы абяцанні выходнага. Таксама на сходзе выступіў старшыня прафсаюза студэнтаў Сяргей Азяўчыкаў, які паведаміў, што раіўся са студэнтамі, і яны не супраць датэрміновага галасавання і адмены заняткаў. Але варта заўважыць, што асаблівага энтузіязма з боку студэнтаў не адчувалася», - дадаў студэнт.
“Праваабаронцы за свабодныя выбары”
