Адміністрацыйная справа Вайцешыка: пракуратура лічыць, што Нясвіжскі РАУС парушыў закон Дапоўнена
Праваабаронца "Вясны" і юрыст Прафсаюза РЭП з Баранавічаў Аляксандр Вайцешык, якога павінны судзіць па адміністрацыйным артыкуле аб дробным хуліганстве за тое, што спрабаваў трапіць на пасяджэнне агракамбіната "Сноў", працягвае абскарджваць дзеянні як суддзяў, так і міліцыі. І на яго бок стала пракуратура.
Нагадаем, што Аляксандра Вайцешыка затрымалі ў Нясвіжы 22 лютага, калі ён спрабаваў прайсці на сход агракамбіната "Сноў" у якасці даверанай асобы былога работніка агракамбіната Вячаслава Сырыцы. Праваабаронца планаваў прадстаўляць інтарэсы Сырыцы, бо на сходзе вырашалі пытанне аб яго выключэнні з агракамбіната і пазбаўлення звання ганаровага работніка. Аднак дружыннікі і міліцыя, якія стаялі на ўваходзе ў залу, не захацелі прапусціць Вайцешыка ўнутр. Канфлікт скончыўся затрыманнем праваабаронцы, а пасля гэтага яму стала дрэнна, і ён апынуўся на некалькі дзён у шпіталі.
Пасля выпіскі нясвіжскія міліцыянты склалі на яго пратакол за "дробнае хуліганства" (артыкул 17.1 КаАП) - за тое, што ён нібыта штурхаў дружынніка і перашкаджаў грамадзянам праходзіць у залу на сход.
У выніку месяц яго справа перакідвалася ад аднаго суда ў іншы, а напрыканцы сакавіка яна была вернутая ў РАУС Нясвіжскага раёна на дапрацоўку.
![]()
Суд упарта не хоча судзіць праваабаронцу Вайцешыка. Чакаюць выхаду тэрмінаў?
Праваабаронца лічыць, што суд над ім адкладаюць спецыяльна, каб тэрміны яго разгляду выйшлі. На яго думку, суд і міліцыя разумеюць, што ў яго дзеяннях няма складу правапарушэння, і хочуць, каб справа сама сабой спынілася на нерэабілітуючых падставах. У такой сітуацыі Вайцешык ужо не зможа прыцягнуць міліцыянтаў да адказнасці за незаконнае затрыманне.
Таму праваабаронца вырашыў не чакаць заканчэння адміністрацыйнага працэсу і накіраваў заяву ў пракуратуру Нясвіжскага раёна, у якой апісаў усе парушэнні, дапушчаныя Нясвіжскім РАУС падчас падрыхтоўкі яго справы. А гэта і неразгляд хадайніцтваў праваабаронцы, і парушэнне парадку вядзення адміністрацыйнага працэсу, і няпоўнае вывучэнне абставінаў справы.
І нечакана для Аляксандра Вайцешыка пракурор Аляксандр Алісевіч пагадзіўся з яго довадамі. Пракуратура правяла праверку і па яе выніках вынесла прадстаўленне начальніку Нясвіжскага РАУС, у якім таксама ёсць пытанне аб прыцягненні вінаватых міліцыянтаў да адказнасці.
У хуткім часе стане вядома, як Нясвіжская міліцыя адрэагуе на гэтае прадстаўленне. А 14 красавіка праваабаронца ўрэшце рэшт атрымаў позву прыйсці на судовае пасяджэнне, якое адбудзецца ў Баранавіцкім раённым судзе 16 красавіка ў 11.00
Навіны ад Spring96.org у Telegram. Падпішыся на наш канал https://t.me/viasna96