Міхаіл Жамчужны застаўся без пенсіі. Прынамсі, на тры месяцы

Знаходзячыся за кратамі, 60-гадовы заснавальнік расфармаванай ПКАУ "Платформ інавэйшн" мог распачаць працэдуру афармлення пенсіі толькі адным шляхам – праз перапіску. Аднак адказу на свой зварот у сацыяльную службу Кастрычніцкага раёна Віцебска, дасланы яшчэ ў жніўні, ён не атрымаў дагэтуль.

Пасля бясплённага звароту да раённых чыноўнікаў ён мусіў звярнуцца ў абласны камітэт па працы, занятасцi i сацыяльнай абароне. І туды давялося пісаць двойчы, пакуль нарэшце не прыйшоў адказ ад старшыні камітэту Аляксандра Хрыстафорава. З яго вынікае, што пенсію за апошнія тры месяцы Жамчужны атрымаць ужо не зможа, бо "не распачаў своечасова працэдуру афармлення".

Гісторыю перапіскі з чыноўнікамі Міхаіл Жамчужны выклаў у лістах да віцебскага праваабаронцы Леаніда Свеціка.

"Жамчужны не мае блізкіх сваякоў, якія займаліся б афармленнем пенсіі, таму паспадзяваўся на перапіску з адпаведнымі службамі. Праз два месяцы чакання з абласнога камітэта па працы, занятасцi i сацыяльнай абароне яму напісалі, што ў лісце з раённага аддзелу яму ўжо даўно напісалі, як трэба распачынаць працэдуру афармлення. Аднак такога ліста Міхаіл не атрымліваў. Таму ён рыхтуе зварот у суд, каб з чыноўнікаў спагналі за тое, што ён пратэрмінаваўся з працэдурай афармлення і страціў пенсію за тры месяцы. Таксама ён звярнуўся ў Міністэрства працы і сацыяльнай абароны, каб там разабраліся з ягонай сітуацыяй. А сітуацыя сведчыць пра тое, наколькі бяспраўны чалавек за кратамі: ён як нідзе ў іншым месцы залежыць ад вынікаў перапіскі. Лісты за краты даходзяць далёка не ўсе, і ці пісалі іх увогуле, часта застаецца невядомым. Між тым пенсія для Міхаіла Жамчужнага – гэта вельмі істотна. Бо ён адзінокі чалавек і не мае блізкіх сваякоў, якія маглі б матэрыяльна падтрымаць яго ў зняволенні, " - гаворыць Л.Свецік.

Праваабаронца атрымаў апошні ліст ад Міхаіла Жамчужнага, які быў датаваны 13 кастрычніка. Гэты ліст быў напісаны ў Віцебскім СІЗА. Таму застаецца невядомым, калі і ці будзе Жамчужны этапаваны ў Мінск на разгляд ягонай скаргі ў Вярхоўным судзе, прызначаны на 23 кастрычніка.

Першапачаткова касацыйную скаргу Вярхоўны суд меўся разглядаць 6 кастрычніка. Але ў сувязі з тым, што пракурор вынес пратэст і патрабуе для Міхаіла Жамчужнага большага пакарання, чымсьці вырашыў 10 ліпеня Віцебскі абласны суд, сам падсудны павінен прісутнічаць падчас паседжання, а паколькі гэтага не было забяспечана, была прызначана пазнейшая дата.

Заснавальніка расфармаванай ПКАУ "Платформ инавэйшн"асудзілі да шасці гадоў зняволення ва ўмовах строгага рэжыму, пракурор ад пачатку прасіў для яго 7 гадоў зняволення. Жамчужны быў прызнаны вінаватым у незаконным набыцці з мэтай збыту сродкаў для патаемнага атрымання інфармацыі, падбухторванні да наўмыснага раскрыцця звестак, якія складаюць службовую таямніцу, і спробах даць хабар за атрыманне інфармацыі. Судовы працэс праходзіў у закрытым рэжыме, таму для праваабаронцаў і грамадскасці па-ранейшаму застаюцца нявысветленымі абставіны крымінальнага пераследу Міхаіла Жамчужнага.

Вярхоўны суд будзе разглядаць касацыйную скаргу заснавальніка расфармаванай ПКАУ "Платформ инавэйшн" Міхаіла Жамчужнага таксама ў закрытым рэжыме. Аднак ёсць верагоднасць, што грамадскасць і журналісты змогуць патрапіць на агалошванне рэзалютыўнай часткі судовага рашэння. Ці будзе прысутнічаць на разглядзе скаргі сам М. Жамчужны, пакуль невядома. Аднак ён сам прасіў, каб такую магчымасць яму далі.