Грамадскі актывіст з Кобрына Алесь Мех абскардзіў рашэнне аб накладанні на яго штрафу за выступ на акцыі супраць расійскіх вайсковых баз
4 кастрычніка на плошчы Свабоды прайшла акцыя супраць расійскай авіябазы
9 кастрычніка суддзя Цэнтральнага раёна Мінска Таццяна Рак пакарала Алеся Меха штрафам у 40 базавых велічынь ( 7 200 000 рублёў) па абвінавачанні ва ўдзеле ў несанкцыянаваным масавым мерапрыемстве, якое адбылося 4 кастрычніка ў Мінску на плошчы Свабоды. Акцыя "За мірную, нейтральную Беларусь" была праведзена супраць размяшчэння расійскіх ваенных баз на тэрыторыі Беларусі. Перад удзельнікамі выступілі палітыкі і актывісты, у іх ліку і Алесь Мех.
Адразу пасля выступу да Алеся Меха падыйшоў капітан міліцыі Аляксандр Кухта для складання пратакола. На прапанову капітана знаёміцца са зместам пратакола і падпісаць яго, Мех адмовіўся, не стаў чытаць і падпісваць, паколькі не лічыў сябе вінаватым.
Актывіст лічыць, што накладзенае на яго пакаранне з’яўляецца незаконным, у сувязі з чым просіць Мінскі гарадскі суд адмяніць рашэнне суда Цэнтральнага раёна, а справу спыніць.
