Брэст: незалежная журналістка Іна Хоміч падала касацыйную скаргу

Яна аспрэчвае пастанову суда Маскоўскага раёна Брэста, які 1 красавіка пакараў яе штрафам памерам 30 базавых велічыняў “за незаконны распаўсюд і выраб прадукцыі СМІ”.

У сваёй скарзе Іна Хоміч таксама просіць Брэсцкі абласны суд звярнуцца праз Вярхоўны суд у Канстытуцыйны суд, каб той праверыў адпаведнасць Закона аб СМІ нормам Канстытуцыі Рэспублікі Беларусь. У прыватнасці, журналістка выказвае меркаванне, што патрабаванне абавязковай акрэдытацыі парушае канстытуцыйныя правы грамадзян, бо Асноўны Закон краіны вызначае, што можна свабодна збіраць і распаўсюджваць інфармацыю. Гэтае права замацавана і Міжнародным пактам аб грамадзянскіх і палітычных правах, ратыфікаваным Беларуссю.

Іна Хоміч хоча прыцягнуць увагу да таго, што ў Беларусі абмяжоўваецца права грамадзян збіраць інфармацыю, хаця гэта гарантуецца Канстытуцыяй. Між тым, ужо сёлета за падрыхтоўку інфармацыі для замежных СМІ у Беларусі пакараны штрафамі шэсць незалежных журналістаў (некаторыя з іх паўторна).