Старшыню “Саюзу палякаў на Беларусі” будуць судзіць
Стала вядома, што яшчэ адзін прадстаўнік незарэгістраванага ўладамі “Саюзу палякаў на Беларусі” -- яго старшыня Мечыслаў Яськевіч неўзабаве будзе выкліканы ў суд на адміністрацыйны працэс. Шчучынская міліцыя пераслала ў Гродна копію пратакола пра нібыта здзейсненае Яськевічам адміністрацыйнае правапарушэнне – правядзенне несанкцыянаванага мітынгу.
12 траўня бягучага году сябры Саюзу палякаў усталявалі ў вёсцы Рачкаўшчына (Шчучынскі раён) крыж у памяць апошняга кіраўніка спалучаных узброеных сілаў Арміі Краёвай Анатоля Радзівоніка, які загінуў у гэтай мясцовасці ў 1949-ым годзе.
Яшчэ раней стала вядома, што аналагічны пратакол складзены прадстаўнікамі Шчучынскага РАУС на 82-гадовую Вераніку Себасцьяновіч. Калі дакладна ў судах адбудуцца гэтыя адміністрацыйныя працэсы, пакуль невядома.
