У Наваполацку забаранілі пікет 19 снежня
Актывіст аргкамітэту па стварэнні партыі БХД Сяргей Малашанак падаваў заяўку на пікет, мэтай якога было выражэнне грамадскага пратэсту супраць незаконнага зняволення грамадзян Беларусі, у тым ліку былых кандыдатаў – удзельнікаў мінулых прэзідэнцкіх выбараў. З Наваполацкага гарвыканкаму даслалі адмову.
Ліст з выканкаму падпісаны намеснікам старшыні гарвыканкаму Вячаславам Дурновым. Адмова гунтуецца на тым, што месца меркаванага пікета – пляцоўка каля крамы "Дамалюкс" – не ўваходзіць у пералік дазволеных месцаў для правядзення масавых акцый.
Зрэшты, цяпер у Наваполацку ўжо не "пералік" месцаў, а ўсяго адно – пляцоўка каля ўваходу ў бязлюдны зімой гарадскі Парк культуры і адпачынку на вуліцы Паркавай. Пра гэта даведаліся заяўнікі іншага пікету, прымеркаванага да ўгодкаў прыняцця Дэкларацыі правоў чалавека.
Чыноўнікі забаранілі акцыю, запланаваную на 10 снежня, бо пляцоўка каля гарадскога дома культуры ўжо не з'яўляецца месцам для масавых імпрэзаў. Як высветлілася з афіцыйнага ліста, гарвыканкам яшчэ год таму ўнёс адпаведныя папраўкі ў сваё ранейшае рашэнне. Але грамадскасць горада пра гэта апавясціць не палічылі патрэбным.