Ператрус на менскім офісе Радыё Рацыя
Супрацоўнікі міліцыі прыйшлі на мінскі офіс радыёстанцыі «Рацыя» прыкладна ў 20:30. Яны абыходзілі кватэры, што знаходзяцца побач з плошчай Перамогі, дзе павінна адбывацца рэпетыцыя парада да 9 мая.
Журналіст, які ў гэты час дзяжурыў у рэдакцыі, адчыніў дзверы. Пасля таго, як міліцыянты пабачылі лагатыпы «Рацыі», яны выклікалі падмогу з Цэнтральнага РУУС.
Зараз складаецца пратакол на канфіскацыю кампутараў, што ёсць у офісе. У кватэры знаходзіцца трое міліцыянтаў, яшчэ некалькі дзяжурыць у пад’ездзе. Затрыманы журналіст Радыё Рацыя Генадзь Барбарыч.
Сітуацыю каментуе старшыня Ўправы Радыё Рацыя Яўген Вапа:
- Чарговая атака на журналістаў Беларускага Радыё Рацыя сведчыць пра тое, наша радыё ёсць тым вяшчаннем, якое дае незалежную інфармацыю грамадзянам Беларусі. А незалежнай інфармацыі баяцца беларускія ўлады. Вялікае дзякуй нашым журналістам, якія вытрымліваюць у гэты момант пераслед за прафесійную дзейнасць. Магчыма, нам будуць перарываць вяшчане, будуць яго абмяжоўваць, але мы працягнем выконваць сваю працу. Асабліва ў кантэксце таго, што заўтра маем Дзень свабоды незалежнай прэсы. Сённяшнія падзеі сведчаць пра тое, якая сітуацыя са свабодай СМІ у Беларусі. Таму працавалі і будзем надалей працаваць.
* * *
Паводле інфармацыі на 23-00, міліцыянты ўжо сышлі. Як паведаміў намеснік старшыні ГА "БАЖ" Андрэй Бастунец, які прыехаў на месца падзеяў, міліцыянты склалі "пратакол агляду", у якім указалі, што забіраюць тэхніку на праверку. Інфармацыя пра затрыманне журналіста Генадзя Барбарыча не пацвердзілася.
