Фотарэпартаж з варшаўскіх пікетаў за вызваленне Алеся Бяляцкага
Прадстаўнікі шэрагу праваабарончых арганізацый – з Польшчы, Нарвегіі, Кіргізіі, Арменіі, Расіі, Украіны, Узбекістана, Таджыкістана, Грузіі, Беларусі і Міжнароднай Федэрацыі за правы чалавека – 27 верасня зладзілі пікет з патрабаваннем вызвалення беларускіх палітвязняў. Адбыўся пікет каля будынку гатэля “Сафітэль”, у якім гэтымі днямі праходзіць сустрэча АБСЕ па чалавечым вымярэнні. Пікетоўцы выйшлі з плакатамі “Свабоду палітвязням!”, “Свабоду Алесю Бяляцкаму!” і партрэтамі вязняў.
Пазней пікетоўцы перайшлі ў Кракаўскае прадмесце, што ў цэнтры польскай сталіцы.
Адметна, што ў пікетах у падтрымку Алеся Бяляцкага ўзяла ўдзел вядомая ўзбекская праваабаронца Мутабар Таджыбаева (на здымку – разам з сынам Алеся Бяляцкага Адамам і прадстаўніком FIDH Сашай Кулаевай).
Што азначае быць палітвязнем, яна ведае не па чутках – амаль тры гады адседзела ў турме, дзе да яе прымяняліся катаванні. Гэта вельмі вядомая, неардынарная і мужная жанчына з’яўляецца лаурэаткай прэміі Французскай рэспублікі “Свабода, роўнасць і братэрства” за абарону правоў чалавека (2008), а таксама прэміі Дзярждэпартамента ЗША за адвагу - International Women of Courage award (2009). Цяпер Мутабар Таджыбаева, добрая знаёмая Алеся Бяляцкага, жыве ў Францыі. Адна з апошніх іх сустрэчаў адбылася ў Парыжы ў снежні 2008-га года, падчас святкавання 60-ай гадавіны Усеагульнай дэкларацыі правоў чалавека, што ладзілася ў Палацы Токіё.
