Прызначана дата разгляду касацыйных скаргаў “бабруйскіх анархістаў”

Касацыйныя скаргі на прысуды па справе падпалу бабруйскага КДБ будуць разглядацца ў Магілёўскім абласным судзе 14 ліпеня. Судовае паседжанне распачнецца а 10-ай гадзіне.   

Фігуранты справы Яўген Васьковіч, Павел Сырамолатаў і Арцём Пракапенка асуджаныя да сямі гадоў калоніі  ўзмоцненага рэжыму. Суддзя Павел Карцінін прызнаў іх вінаватымі ў падпале будынку бабруйскага аддзялення КДБ (ч. 2 арт. 339 КК — “Асабліва злоснае хуліганства”). Прысуд быў абвешчаны 18 траўня.

Нагадаем, што невядомыя асобы ў ноч з 16 на 17 кастрычніка 2010 г. у Бабруйску здзейснілі напад на будынак КДБ. На ганак была кінута бутэлька з гаручай сумессю. Пашкоджанымі аказаліся толькі дзверы.