Прызначана дата судовага паседжаньня над палітвязьнем Артурам Фінькевічам

Як паведаміў ПЦ "Вясна" магілёўскі праваабаронца Барыс Бухель, толькі што ў канцэлярыі суду ён даведаўся, што разгляд крымінальнай справы, узбуджанай у дачыненьні да палітвязьня Артура Фінькевіча, прызначаны на 20 сьнежня, пачатак паседжаньня ў 10-30.  Суд накіраваў у магілёўскі дзяржаўны ўніверсітэт імя Куляшова зварот аб прадстаўленьні на працэс перакладчыка на беларускую мову.

Нагадаем, 9 сьнежня скончыўся тэрмін адбыцьця пакараньня асуджанага за напісаньне палітычных графіці, аднак напрыканцы кастрычніка кіраўніцтва Магілёўскай спецкамендатуры вынесла маладафронтаўцу чацьвёртае адміністратыўнае спагнаньне. Артур Фінькевіч быў зьмешчаны ў СІЗА, у дачыненьні да яго ўзбуджана чарговая крымінальная справа за ўхіленьне ад адбыцьця пакараньня ў выглядзе абмежаваньня волі. Цяпер моладзеваму лідэру пагражае да трох гадоў пазбаўленьня волі.