Еўрапарламент: "Выбары, якія праводзяцца ў атмасферы страху і рэпрэсій, не могуць лічыцца справядлівымі"
Ілюстрацыйнае фота
Еўрапейскі парламент 29 кастрычніка выступіў з заявай, піша DW. У ёй пацвярджаецца непахісная падтрымка суверэнітэту і незалежнасці Беларусі, а таксама поўная падтрымка дэмакратычнага права народа Беларусі выбіраць сваіх прадстаўнікоў на свабодных і справядлівых выбарах.
Еўрапарламент нагадвае, што пасля сфальсіфікаваных выбараў у 2020 годзе сітуацыя ў Беларусі істотна пагоршылася: дзясяткі тысяч людзей былі арыштаваныя, у краіне цяпер больш за 1300 палітвязняў, сярод якіх і апазіцыйныя лідары, дзясяткі тысяч беларусаў былі вымушаныя пакінуць краіну. У заяве яшчэ раз асуджаюцца сістэматычныя, распаўсюджаныя і грубыя парушэнні правоў чалавека ў Беларусі.
"Мы падкрэсліваем, што выбары, якія праводзяцца ў цяперашняй атмасферы страху і рэпрэсій, ва ўмовах, якія супярэчаць усім міжнародна прызнаным стандартам, без магчымасці для беларусаў, якія пражываюць за мяжой, рэалізаваць сваё права галасаваць і балатавацца ў якасці кандыдатаў на выбарах, без празрыстай сістэмы падліку галасоў і без удзелу міжнародных назіральнікаў, не могуць лічыцца справядлівымі і свабоднымі", — гаворыцца ў заяве.
Таму Еўрапарламент заклікае рэжым у Беларусі ў поўнай меры выконваць правы чалавека, права на свабоду аб'яднанняў, у тым ліку для палітычных партый, пакласці канец усім формам рэпрэсій, пераследаў і запалохвання і вызваліць усіх палітычных зняволеных.
Павел Сапелка: "Сярод 1300 палітвязняў — прэтэндэнты на гэтую пасаду з ранейшых выбараў, усе ўтрымліваюцца ў рэжыме інкамунікада"
