Шэсць год пазбаўлення волі для палітвязня Віталя Барысевіча Дапоўнена
Віталь Барысевіч. Фота з сацыяльных сетак
У судзе Ленінскага раёна Мінска 11 сакавіка распачаўся працэс над палітвязнем Віталём Барысевічам. Яго абвінавачваюць ва ўдзеле ў масавых беспарадках па ч.2 арт. 293 Крымінальнага кодэкса.
Справу разглядае суддзя Таццяна Шоцік.
Віталя Барысевіча затрымалі 24 лістапада 2021 года. Да суда ўтрымліваўся ў СІЗА №1 Мінска.
Па папярэдняй інфармацыі, у тэлеграм-канале МУС Беларусі з'явілася паведамленне пра тое, што Віталь нібыта ў жніўні 2020 года прымаў актыўны ўдзел у масавых беспарадках у раёне гандлёвага цэнтра "Рыга".
"Разам з іншымі агрэсіўна настроенымі ўдзельнікамі здзяйсняў пагромы і знішчаў маёмасць: ламаў тратуарную плітку, узводзіў барыкады, перакрываў рух транспарту", - паведамляла ведамства.
Вядома, што ў першы дзень судовага пасяджэння абвінавачанне запрасіла для Віталя пазбаўленне волі ў калоніі ўзмоцненага рэжыму тэрмінам на 6 год.
Судовае пасяджэнне працягнулася ў панядзелак, 14 сакавіка.
Суддзя Таццяна Шоцік прызнала Віталя Барысевіча вінаватым і пастанавіла пакараць яго пазбаўленнем волі ў калоніі ўзмоцненага рэжыму тэрмінам на шэсць год.
