За спробу суіцыду зняволенага пакаралі накіраваннем у штрафны ізалятар
У героя адной з нядаўніх публікацый “Вясны” жыхара Мінска Дзмітрыя Мішакоўскага, які ўтрымліваецца ў СІЗА №1 у чаканні судовага працэсу, працягвае імкліва пагаршацца зрок.
Дзмітрыя Мішакоўскага моцна збілі супрацоўнікі міліцыі 12 жніўня 2020 года. Прычым, білі і рукамі, і нагамі, і дубінкамі. Білі берцамі па галаве, не давалі падняцца. Ад удараў пакрышыліся зубы. Катаванні працягваліся і на Акрэсціна, куды яго даставілі пасля затрымання. Усё гэта не прайшло бясследна для здароўя.
![]()
Лёс Дзмітрыя Мішакоўскага: удзельнічаў у акцыях пратэсту, быў збіты, страціў зрок, патрапіў пад новыя крыміналкі
Літаральна праз месяц пасля збіцця Мішакоўскі адчуў, што ў яго пачаў імкліва падаць зрок. Ён звярнуўся да афтальмолагаў і пераканаўся, што праблема са зрокам даволі сур’ёзная. Выявілася, што патрэбна адмысловае лячэнне. Ён планаваў патрапіць за мяжу, каб зрабіць аперацыю на ствалавых клетках, якая б давала надзею спыніць гэты працэс. Але не паспеў, яго ізноў затрымалі па іншай крымінальнай справе.
У красавіку 2021 года Дзмітрыю далі другую групу інваліднасці па зроку.
На мінулым тыдні да праваабаронцаў патрапіў лісток паперы, з дапамогай якога ён спрабаваў патлумачыць сукамернікам, як ён можа разглядаць рэчы. Прычым яму вельмі складана сфакусіраваць зрок у адной кропцы.
Адсутнасць магчымасці паправіць пагаршэнне зроку прывяло да таго, што Мішакоўскі адчувае псіхалагічныя праблемы, яму былі прызначаныя антыдэпрэсанты. Нядаўна ён здзейсніў спробу суіцыду, у выніку чаго быў… пакараны накіраваннем у штрафны ізалятар на 10 сутак.