Бяроза: Участковы запатрабаваў зняць бел-чырвона-белы сцяг з балкона
Журналіст-праваабаронца Тамара Шчапёткіна з Бярозы ў гонар Дня Волі вывесіла на сваім балконе нацыянальны бел-чырвона-белы сцяг (на фота). Рэакцыі з боку міліцыі доўга чакаць не прыйшлося.
Т. Шчапёткіна была здзіўлена ранняму званку непасрэдна ў дзверы кватэры. Жанчына падумала, што суседзі, паколькі ўсе астатнія спачатку карыстаюцца дамафонам.
За дзвярыма стаяў малады чалавек у цывільным. Ён прадставіўся ўчастковым Сяргеем Несцяровічам, хаця пасведчання пры гэтым не паказаў. У кватэру зайсці адмовіўся і спытаў Шчапёткіну, што ў яе вісіць за вакном бел-чырвона-белага колеру.
- А вы што не ведаеце, што гэта такое?- здзіўлена спытала Шчапёткіна.
- Не, - сказаў участковы.
- Беларускі гістарычны сцяг, -растлумачыла жанчына.
- Дык у нас жа чырвона-зялёны, - няўпэўнена працягваў Сяргей Несцяровіч.
- Гэта дзяржаўны.
- Я прыйшоў, бо грамадзяне паскардзіліся, што тое, што вісіць у вас за вакном, іх абражае.
- А словы на будынках з трох літар, якія “радуюць” вока гадамі, іх не абражаюць? - абурана спытала Тамара Шчапёткіна.
- Не, да іх яны прывыклі, - бесхітрасна адказаў ахоўнік парадку.
- Дык пакажыце заяву гэтых грамадзян.
- Яны стаяць на вуліцы. Вам будзе павестка, прыйдзеце ў міліцыю, -- папярэдзіў участковы.
- Чаму вы прымушаеце зняць наш гістарычны сцяг?
- Я не прымушаю. А калі вам будзе павестка ў міліцыю, дык ведайце, па якому пытанню. Больш я вас не затрымліваю, - сказаў участковы Сяргей Несцяровіч, збягаючы ўніз па лесвіцы.
Унізе яго чакалі чацвёра таварышаў таксама ў цывільным.
