Франака Вячорку забіраюць у войска 26 студзеня
Як паведамлялася раней, сёньня супрацоўнікі праваахоўных органаў у цывільным і амапу ў камуфляжы ўварваліся ў абласны шпіталь, дзе праходзіў прымусовае абсьледваньне моладзевы актывіст, старшыня Моладзі БНФ, Франак Вячорка. Па апошніх зьвестках з ужываньнем грубай фізічнай сілы у кайданках ён быў гвалтоўна вывезены на чорнай машыне і дастаўлены ў ваенкамат Савецкага раёну. Ніякіх дакументаў і медычнага заключэньня абласнога шпіталю прадстаўлена не было, на словах Франаку сказалі, што ён прызнаны годным да вайсковай службы.
Сам ваенкамат быў зачынены, туды нікога не пускалі, нават бацькоў. У ваенкамаце актывісту ўрычылі заключэньне медабсьледваньня, позву на 26 студзеня і адпусьцілі. Арыну Вячорка, маці Франака, якая спрабавала ўвайсьці ў ванкамат, павезьлі ў РУУС Савецкага раёну.
Нагадаем, што ў сувязі з гэтым Праваабарончы цэнтр “Вясна” заяўляе пра адсутнасьць падставаў давяраць дакладнасьці і праўдзівасьці медыцынскіх заключэньняў, якія выносяцца медыкамі пад відавочным ціскам спецслужбаў.
Праваабарончы цэнтр “Вясна” заяўляе, што расцэньвае падобныя дзеяньні спецлужбаў у дачыненьні да моладзевых актывістаў, як палітычна матываваны перасьлед, выкарыстаньне Узброеных сілаў у мэтах барацьбы з іншадумцамі ў краіне.
Мы нагадваем беларускім уладам, што падобныя “законныя” спробы нейтралізацыі моладзевых грамадзкіх ды палітычных актывістаў не спрыяюць паляпшэньню сітуацыі з правамі чалавека ў краіне і зьяўляюцца адной з формаў ціску на палітычных апанентаў.
