Затрыманні і новыя пратаколы. Хроніка пераследу за 13 кастрычніка
Сідзячы пратэст каля НАН 12 кастрычніка. Фота "Новы час"
13 кастрычніка ў Беларусі працягваліся затрыманні актывістаў і ўдзельнаў акцый пратэсту.
Раніцай у Магілёве быў затрыманы палітык Уладзімір Шанцаў. Супрацоўнікі міліцыі заявіліся да яго проста дадому і запатрабавалі, каб ён праехаў з імі, нібыта "пагутарыць". У РАУС на яго хацелі скласці пратакол за акцыю 17 верасня, за якую яго раней ужо асудзілі. У выніку Шанцава адпусцілі без пратакола.
У Мінску днём каля Акадэміі навук супрацоўнікамі ў масках і форме без апазнавальных знакаў быў затрыманы супрацоўнік Інстытута гісторыі Уладзімір Шыпіла. Яго даставілі ў суд Першамайскага раёна і там асудзілі на 7 сутак арышту.
13 кастрычніка ў Мінску затрымалі 24-гадовую Аляксандру Сітнікаву — шматразовую чэмпіёнку Беларусі па тайскім боксе і К1, трохразовую бронзавую прызёрку чэмпіянатаў Еўропы па муай-тай, піша Еўрарадыё
Як паведамляе Беларускі фонд спартовай салідарнасці, дзяўчыну даставілі ў Цэнтральны РУУС. 14 кастрычніка павінен адбыцца суд над ёй.
Таксама паведамляецца пра затрыманні ў сталіцы наступных людзей:
- Абрамчук Раман
- Аўсянскі Аляксандр
- Гулідаў Уладзімір - затрыманы на праспекце Машэрава, дзе стаяў у ланцугу салідарнасці.
- Дубовік Дзмітрый
- Іваніцкі Артур - РУУС Ленінскага раёна
- Кашнікаў Алег
- Кулагіна Наталля - адпусцілі з РУУС Кастрычніцкага раёна
- Лысенка Данііл
- Нежавец Аляксандр
- Патапенка Дзмітрый
- Радзько Надзея
- Тараскевіч Дзмітрый - ЦІП на Акрэсціна
- Умецкі Максім - РУУС Фрунзенскага раёна
У Наваполацку ў гэты дзень былі затрыманы Капшуль Аляксандр, Печанегаў Дзмітрый, Бялоў Аляксандр. На ўсіх склалі пратаколы па арт. 23.34 КаАП за ўдзел у акцыі 11 кастрычніка. 14 кастрычніка мусіць адбыцца суд.
