Суд над маладафронтаўцамі: па 40 базавых велічынь за ўскладанне кветак

2019 2019-10-04T12:10:22+0300 2019-10-07T11:42:19+0300 be https://spring96.org/files/images/sources/sud_malady_front_.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Дзяніс Урбановіч і Віталь Трыгубаў на лаве падсудных у судзе Цэнтральнага раёна г. Мінска

Дзяніс Урбановіч і Віталь Трыгубаў на лаве падсудных у судзе Цэнтральнага раёна г. Мінска

У 9.30 гадзін 4 кастрычніка ў суде Цэнтральнага раёна адбыўся разгляд справы ў дачыненні да актывістаў “Маладога фронта” Дзяніса Урбановіча і Віталя Трыгубава.

Хлопцаў абвінавачвалі ў несанкцыянаваным масавым мерапрыемстве (ч. 3 арт. 23.34 КаАП) за роварны прабег.

Справу разглядала суддзя Вікторыя Шабуня.

Падчас працэсу абвінавачаныя заявілі хадайніцтва аб адводзе суду, але суддзя яго адхіліла.

Адзін з супрацоўнікаў міліцыі ў цывільным праводзіў відэаздымку падчас працэса.

Першым у судзе выступаў Дзяніс Урбановіч. Ён запытваўся, навошта браць дазвол, каб ускласці кветкі ў скверы? Выказаў думку, што гэта не было масавым мерапрыемствам, а тое, што быў складзены пратакол – рэпрэсіі супраць актывістаў.

Віталь Трыгубаў дапоўніў выступ свайго паплечніка тым, што пратакол быў складзены незаконна. У іх дзеяннях не было складу правапарушэння, бо яны проста паехалі па горадзе, вырашылі ўшанаваць памяць вялікага паэта і ўсклалі кветкі. Заканадаўства, па меркаванні актывіста, такія дзеянні не парушаюць.  

“Калі я паеду ўскласці кветкі да помніка Перамогі ці на могілкі да родных – гэта таксама будзе пікетаванне?”, - запытаўся Трыгубаў у суддзі.

У судзе выступіў таксама сведка-міліцыянт Сяргей Астаф’еў. Ён заявіў, што была знойдзена інфармацыя пра планаванне правядзення несанкцыянавай акцыі праз тэлеграм-канал. Аднак у суда такой інфармацыі няма, і суддзя яе нават не запатрабавала.

Пасля выступу сведкі суд перайшоў да азнаямлення з матэрыяламі справы, пры гэтым Вікторыя Шабуня не дала магчымасці абвінавачаным далучыць да матэрыялаў фотаздымкі з месца падзей.

Пасля невялікага перапынку суд вынес рашэнне пакараць Дзяніса Урбановіча і Віталя Трыгубава штрафам у памеры 40 базавых велічынь кожнаму.

Нагадаем, 25 жніўня, у дзень падпісання Дэкларацыі аб дзяржаўным суверэнітэце, актывісты “Маладога фронту” Віталь Трыгубаў, Дзяніс Урбановіч і Максім Урбановіч зрабілі роварны прабег з прыпынкам у скверы Янкі Купалы, дзе ўшанавалі памяць паэта. Затым яны паехалі ў Курапаты на варту каля рэстарацыі “Паедзем, паядзім”.

Пазней яны атрымалі пратаколы адміністрацыйнага правапарушэння па артыкуле 23.34 КаАП.

Апошнія навіны

Партнёрства

Сяброўства