Услед за эканамістам Чалым у Мінску асудзілі дызайнерку Юлю Ляшкевіч
Юлія Ляшкевіч. Фота з сацыяльных сетак.
У судзе Цэнтральнага раёна Мінска 24 траўня разглядалася адміністрацыйная справа крэатыўнай рэкламшчыцы Юліі Ляшкевіч. Яе звінавацілі ва ўдзеле ў несанкцыянаванай акцыі – “Чарнобыльскім шляху”, які адбыўся ў Мінску 26 красавіка.
Суддзя Вікторыя Шабуня прадказальна вынесла пастанову аб прыцягненні Ляшкевіч да адміністрацыйнай адказнасці ў выглядзе штрафу ў памеры 20 базавых велічынь, альбо 510 рублёў.
“Чарнобыльскі шлях – 2019” стаў самым нешматлюдным за ўсю гісторыю іх правядзення: удзел бралі, апрача журналістаў і супрацоўнікаў міліцыі ў цывільным, прыкладна каля 40-ка грамадзян. Аднак па ўзроўню адміністрацыйнага пераследу ягоных удзельнікаў імкнецца да сумнага лідэрства.
Праваабаронцам вядома, што сямёра удзельнікаў шэсця пакараны адміністрацыйнымі штрафамі і папярэджаннямі, а ў дачыненні яшчэ да дзесяці удзельнікаў маршу складзеныя пратаколы, якія чакаюць свайго разгляду ў судах.
Сярод тых, хто спазнаў пераслед за ўдзел у "Чарнобыльскім шляху" - Валер Рабцаў, Таццяна Барэль, Аляксей Драбышэўскі, Дзмітрый Кучук, Віталь Трыгубаў, Сяргей Чалы.
