Што змяняецца ў беларускіх медыя з 1 снежня?

З 1 снежня інтэрнет-рэсурсы абавязаныя ідэнтыфікаваць каментатараў на сваіх форумах з прывязкай да нумара тэлефона.

Праўда, дапускаюцца і іншыя магчымасці ідэнтыфікацыі, але яны дакладна не апісаныя заканадаўцам. Падрабязна пра парадак ідэнтыфікацыі можна пачытаць тут.

Відавочна, што хутка перабудавацца пад новыя патрабаванні, агучаныя ўрадам толькі ў панядзелак, 26 лістапада, змогуць не ўсе. Некаторыя медыя ў гэтай сітуацыі прынялі рашэнне наогул адключыць каментары на сайце.

Уладальнікі інтэрнэт-рэсурсаў будуць несці адказнасць за ўвесь кантэнт на сваіх сайтах, уключаючы каментары чытачоў, рэкламныя банэры і інш.

Калі на інтэрнэт-рэсурсе выявяць забароненую інфармацыю, гэта пагражае ўладальніку папярэджаннем, штрафам ці нават блакіроўкай сайта.

Штрафы, дарэчы, немалыя: для фізічнай асобы - да 20 базавых велічынь, для юрыдычнай асобы - да 100 базавых, а ў выпадку рэгістрацыі сайта ў якасці СМІ - да 200 базавых.

Уводзіцца добраахвотная рэгістрацыя інтэрнэт-рэсурсаў у якасці СМІ (сеткавых выданняў).

Гэта значыць, што інтэрнэт-сайты нарэшце змогуць стаць паўнапраўнымі СМІ: выдаваць пасведчанні журналістам, атрымліваць акрэдытацыю пры дзяржорганах і г.д.

Праўда, сумнеўна, ці змогуць зрабіць гэта ўсе жадаючыя: парадак рэгістрацыі застаецца неабгрунтавана складаным.

Пакуль для рэгістрацыі СМІ, у прыватнасці, патрабуецца, каб рэдакцыяй была юрыдычная асоба, яна размяшчалася ў нежылым памяшканні, галоўны рэдактар ​​меў 5-гадовы стаж працы на кіруючых пасадах у сферы СМІ. Але прадстаўнікі Мінінфарма абяцаюць паслабленні.

Захоўваецца пазасудовы парадак блакавання інтэрнэт-рэсурсаў і ўводзяцца дадатковыя падставы для гэтага.

Зараз гэта:

• распаўсюд інфармацыі, забароненай Законам аб СМІ (арт. 38), іншымі заканадаўчымі актамі і рашэннямі суда;
• невыкананне патрабавання ліквідаваць парушэнні заканадаўства;
• непаведамленне ў Мінінфарм аб іх ліквідацыі;
• вынясенне на працягу года двух і больш папярэджанняў ад Міністэрства інфармацыі.

Зацверджаны парадак аднаўлення доступу да рэсурсу пасля блакавання.

Пры гэтым на абмежаванне доступу да сайта адводзіцца 3 дні, а на аднаўленне доступу пасля ліквідацыі парушэнняў - месяц.

І яшчэ: з 1 снежня дзеянне Закона аб СМІ распаўсюджваецца не толькі на беларускія, але на замежныя медыі ў частцы іх працы на тэрыторыі Беларусі.

Гэта значыць, што Міністэрства інфармацыі зможа прад'яўляць прэтэнзіі нават да замежных выданняў. Пакуль, праўда, не зусім зразумела, як дзяржава будзе карыстацца гэтай магчымасцю.