Дата суда па справе Святаслава Барановіча яшчэ не прызначаная
Святаслаў Барановіч. Фота: nn.by
Паводле інфармацыі ПЦ “Вясна”, пракуратура перадала ў суд крымінальную справу Святаслава Барановіча 5 студзеня, аднак дата суда яшчэ не прызначаная.
Справа Святаслава Барановіча знаходзіцца ў судзе Савецкага раёна Мінска. Сам ён з 2 кастрычніка ўтрымліваецца пад вартай у СІЗА №1 на Валадарскага.
Падставай для крымінальнага пераследу паслужыла тое, што 15 сакавіка 2017 года пасля санкцыянаванага “Маршу недармаедаў” у Мінску ён быў сярод людзей, якія перашкаджалі брутальным затрыманням дэманстрантаў на прыпынку грамадскага транспарту “Плошча Бангалор”.
Першапачаткова справа была распачатая паводле артыкула 339 Крымінальнага кодэкса (“Хуліганства”), а пазней абвінавачванне перакваліфікавалі на артыкул 364 (“Гвалт альбо пагроза ўжывання гвалту ў дачыненні да супрацоўніка органаў унутраных спраў”). Паводле гэтага артыкула, яму пагражае пазбаўленне волі на тэрмін да шасці гадоў.
Праваабаронцы “Вясны” сочаць за гэтай крымінальнай справай і будуць ажыццяўляць маніторынг судовага працэсу.
